Пожарот кај Тепелена, кој избувна во попладневните часови на 12 август 2025 година, во селото Лекел на југот на Албанија, доби алармантни размери. Огнот брзо се прошири на повеќе хектари шума и земјоделско земјиште, предизвикувајќи значителна материјална штета и доведувајќи ги во опасност жителите од тој крај, јавува порталот „Газета експрес“.
Една од најголемите загуби претставува уништувањето на православната црква „Свети Илија“, која важеше за културно наследство од големо значење. Таа светиња, изградена околу 1800 година со заслуга на Танас Ваја, поранешен воен заповедник во служба на Али-паша Тепеленски, беше прогласена за споменик на културата од втора категорија. Иако со векови одолеваше на времето, храмот во овој пожар е целосно уништен.
Посебна загриженост предизвика информацијата дека за време на пожарот експлодирале уште две неексплодирани бомби од Втората светска војна, што дополнително ја отежнува интервенцијата на пожарникарите и спасувачите на теренот.
