Домот на пратеници на италијанскиот парламент на 12 февруари 2026 година едногласно (со 268 гласа) го одобри предлог-законот бр. 2396, со кој се уредуваат односите меѓу државата Италија и Романската Православна Епископија, соопшти епархијата.
Епископијата на Италија упати благодарност до Домот на пратеници за гласањето што ја потврдува духовната и општествената улога на романската православна заедница.
„Денешното гласање претставува круна на мисијата што трае повеќе од пет децении и на жртвата на свештенството и на романските православни верници, кои од 2008 година се под пастирството на Преосвештениот отец Силуан“ − соопшти Епархиската информативна служба.
На седницата на Пратеничкиот дом присуствуваше и амбасадорката на Романија во Италијанската Република, Габриела Данкау.
„Усвојувањето на овој договор не претставува само завршување на сложен законодавен процес, туку и израз на демократска зрелост што го признава значајниот придонес на романската православна заедница во социјалниот, културниот и духовниот живот на современа Италија“ − изјави Нејзината екселенција Габриела Данкау.
„Тоа е воедно и потврда на особените односи меѓу Романија и Италија, засновани врз доверба, заеднички вредности и споделена одговорност за европската иднина што ја градиме заедно“ − додаде амбасадорката на Романија во Италија.
Предлог-законот треба да биде ставен на гласање и во Сенатот на Република Италија, што ќе овозможи финализирање на законодавната постапка и стапување во сила на новата правна рамка.
Усвојувањето на договорот од страна на Домот на пратеници претставува суштински чекор за зацврстување на правниот статус на Романската Православна Епископија во Италија и признавање на значајниот придонес на романската заедница – најбројната странска заедница во Италија – во италијанското општество, соопшти Амбасадата на Романија во Република Италија.
