Минатата недела во Сирија изби брутално насилство, кога безбедносните сили на новата влада започнаа одмазднички убиства врз цивили кои се сметаат за лојални на поранешниот претседател Асад. Најмногу беа погодени алавитските муслимани и сѐ помалубројната христијанска популација во земјата.
Според Сириската опсерваторија за човекови права, со седиште во Велика Британија, околу 745 цивили биле убиени во 30 одделни „масакри“ на западниот брег во петокот и саботата, јавува „Би-би-си“. Други извори, пак, тврдат дека бројот на жртвите достигнува илјадници.
Овој бран напади претставува најтешкото насилство во 14-годишниот граѓански конфликт во Сирија.
„Асошиетед Прес“ известува за еден од најпогодените градови:
Жителите на Банијас, еден од градовите најтешко погодени од насилството, велат дека телата биле расфрлани по улиците или оставени непогребани во домовите и на покривите на зградите, а никој не можел да ги прибере. Еден од жителите изјавил дека вооружените лица со часови им забранувале на луѓето да ги подигнат телата на петмината свои соседи, убиени одблиску во петокот.
Од Латакија, „Видеа од масакрот покажуваат луѓе облечени во цивилна облека натрупани едни врз други додека жените плачат и лелекаат“, пренесува „Гардијан“. Неофицијални извори објавија снимки на кои се гледа како луѓе се злоставуваат и понижуваат пред да бидат убиени. Според „Ројтерс“, неколку стотици лица побарале засолниште во руската воена база во Латакија.
На видеата исто така се гледа како безбедносните сили насилно влегуваат во цркви и ги осквернуваат.
Среде ова разорно насилство врз христијаните и другите малцинства, неговото Блаженство, Патријархот Антиохиски Јован и другите локални сириски и мелкитски католички патријарси објавија заедничка изјава со повик за мир.
