На 24.11.2024 г., Неговото Блаженство Архиепископот Охридски и Македонски г.г. Стефан отслужи Света Архијерејска Литургија во храмот „Свети Кирил и Методиј“ во Сидер Гроув, Њу Џерси, САД. На Архиепископот му сослужуваа: протојерејот Гоце Постоловски, јерејот Даниел Јовановски и протоѓаконот Александар Димитријов.
Со Божествената Литургија заврши дванаесетдневната канонска посета на Њу Џерси и Њујорк, којашто Архиепископот ја изврши по покана на Неговото Високопреосвештенство Митрополитот Американско-канадски г. Методиј, а по повод одбележувањето на јубилејот – 50 години од Осветувањето на првиот храм на црковната општина „Свети Кирил и Методиј“.
За време на посетата Архиепископот ги посети и богослужеше во храмовите: „Св. Кирил и Методиј“ и „Св. Николај Мирликиски“, обата во Њу Џерси и „Св. Климент Охридски“ во Њујорк, а го посети и манастирот „Св. вмч. Георгиј Победоносец“ во Рандолф, Њу Џерси.
