На 28 април 2026 година, во манастирот „Св. Пантелејмон“ во с. Горно Нерези, Неговото Блаженство, Архиепископот Охридски и Македонски г.г. Стефан, во придружба на Неговото Високопреосвештенство Митрополитот Тетовско-гостиварски г. Јосиф, оствари средба со поклоничка група од сестринската Романска Православна Црква.
Поклоничката група беше предводена од Неговото Високопреосвештенство, Митрополитот Молдавски и Буковински и Архиепископ на Јаш, г. Теофан, во придружба на Неговото Преосвештенство, Викарниот Епископ г. Никифор. Во составот на групата беа присутни и игумените и игумениите на манастирите во рамките на Митрополијата на Јаш.
На 29 април, во претпладневните часови, групата ги посети храмовите: „Св. Димитриј Солунски“, „Рождество на Пресвета Богородица“ и Соборниот храм „Св. Климент Охридски“ во Скопје, а потоа и манастирите: „Св. Андреј“ и „Пресвета Богородица“ на Матка.
Претходно, поклоничката група ја посети Струмичката епархија каде што се сретнаа со Митрополитот Струмички г. Наум и викарниот Епископ Стобиски г. Јаков. Таму ги посетија манастирите „Свети Леонтиј“ и „Покров на Пресвета Богородица“ во Водоча, и „Воведение на Пресвета Богородица“ во Вељуса.
Во текот на своето четиридневно поклоничко патување во Македонија, поклониците од Романија ќе ги посетат и манастирите во Дебарско-кичевската епархија.
Извор: https://mpc-spe.mk/arhiepiskop/aktivnosti/poklonicka-grupa-od-romanija-sredba-na-arhiepiskopot/
