Делегацијата на Македонската Православна Црква – Охридска Архиепископија, која по покана на Патријархот Московски и на сета Рус Кирил ја посети Русија, во периодот од 11 до 19 октомври престојуваше во Санкт Петербург и на Валаам.
Во составот на делегацијата беа митрополитот Преспанско-Пелагониски г. Петар, викарниот епископ на Преспанско-пелагониската епархија, епископот Велички г. Николај, и раководителот на Издавачкото одделение на Скопската епархија, јеромонахот Атанасиј Арсоски.
На 11 октомври претставниците на Македонската Православна Црква го посетија Исаакиевскиот храм. Со благослов на клучарот на храмот, протоереј Роман Ковалски, гостите беа пречекани од клирикот на храмот, свештеникот Дионисиј Прозоров. Отец Дионисиј зборуваше за животот на парохијата и за младинските активности што се развиваат во рамките на Исаакиевскиот храм.
Во програмата на престојот во северната престолнина беше вклучена и посетата на Казанскиот катедрален храм, каде што делегацијата ја пречека претседателот на парохискиот совет, протојереј Александар Пашков, кој раскажа за историјата на ова светилиште и за современиот живот на заедницата.
На 13 октомври се одржа посета на Санктпетербуршката духовна академија.
На 14 октомври делегацијата го посети храмот на Смоленските гробишта во градот на Нева. Со благослов на настојателот на Василеостровскиот реон, протојереј Евгениј Шогенов, гостите ги пречека свештеникот Сергиј Ладанов. Во црквата на Смоленската икона на Пресвета Богородица гостите се запознаа со историјата и архитектурата на овој величествен храм, еден од најстарите и најпочитуваните во Санкт Петербург.
Централен момент на посетата беше поклонувањето во параклисот на блажената Ксенија Петербуршка. Гостите од Македонската Православна Црква се поклонија пред гробницата на една од највозљубените и најпочитуваните светителки на градот на Нева и вознесоа молитви кон оваа Божја угодничка.
Митрополитот Преспанско-пелагониски г. Петар, епископот Велички г. Николај и јеромонахот Атанасиј (Арсоски) ја посетија и меморијалниот дом на светиот праведен Јован Кронштатски во градот Кронштат.
Од 15 до 18 октомври делегацијата престојуваше во Валаамскиот манастир.
Во неделата, на 19 октомври, претставниците на Македонската Православна Црква – Охридска Архиепископија сослужуваа со митрополитот Санктпетербуршки и Ладошки Варсонофиј на Литургијата во Кнез-Владимирскиот храм на северната престолнина. Богослужбата се одржа во Успенскиот параклис.
По Литургијата беше извршено славење пред моштите на свештеномаченикот Михаил Сојузов, чиј спомен се празнуваше тој ден.
Во спомен на заедничката молитва, митрополитот Варсонофиј им подари на архијереите на Македонската Црква по една скулптура на рамноапостолниот кнез Владимир, Покрстителот на Русија.
На 20 октомври заврши престојот на македонската делегација во Русија.
