Празникот на светиот великомаченик и исцелител Пантелејмон беше свечено прославен во манастирот подигнат во негово име, во селото Пантелеј, Кочанско.
На 8 август / 26 јули 2024 година, на навечерието на празникот, Неговото Високопреосвештенство Митрополитот Брегалнички г. Иларион отслужи празнична Вечерна богослужба во манастирот. На крајот од службата, тој го благослови и пресече петолебието и одржа пригодна беседа.
На самиот ден на празникот, 9 август / 27 јули 2024 година Митрополитот Иларион отслужи света архиерејска Литургија во манастирот, во сослужување со свештенство од Брегалничката епархија.
Пред почетокот на Литургијата, Митрополитот Иларион, во чтец го произведе г. Љупче Манасиев од Кочани, кој редовно и активно учествува во светите богослуженија.
На крајот од Божествената Литургија, Митрополитот г. Иларион одржа пригодна беседа, изврши мал водосвет и го благослови и пресече празничниот леб.
