Секоја година во средината на октомври, градот Јаши во Романија станува престолнина на романското православие, по повод празникот на Света Преподобна Параскева – Петка. Илјадници верници се обединија и овој пат на храмовата слава, на архијерејската литургија која ја отслужија 25 архијереи од неколку православни цркви.
На Литургијата на којашто началствуваше Високопреосвештениот Архиепископ на Тијатира и Велика Британија г. Никита од Цариградската патријаршија сослужуваше и Неговото Високопреосвештенство Митрополитот Наум Струмички.
Благословената слава на Јаши собра повеќе од 200.000 поклоници од целиот православен свет за да ги целиваат чесните мошти на светата Параскева – Петка, кои се наоѓаат во Јаши од 1641 година. Традиционално, на славата биваат донесени и мошти и од некој друг светител, а оваа година тоа беа моштите на светиот великомаченик и исцелител Пантелејмон.
