На навечерието на празникот, на 27 / 14 август 2024 год., беше отслужена вечерна служба во чест на храмовиот празник Успение на Пресвета Богородица во истоимениот храм во Делчево.
Со вечерната богослужба началствуваше Неговото Високопреосвештенство Митрополитот Неврокопски г. Серафим од Бугарската православна црква, со молитвено присуство на надлежниот Епископ Делчевско-каменички г. Марко. За време на литијните стихири, архијереите, придружувани од свештенството и верниот народ, направија литија околу храмот.
Потоа, Митрополитот г. Серафим го благослови петтолебието.
На крајот на службата, Епископот Марко, обраќајки се со пригодно слово, му посака топло добредојде на Митрополитот Серафим, кој првпат доаѓа во посета на Делчевско-каменичката епархија.
Митрополитот Серафим од своја страна изрази голема благодарност кон Епископот Марко за поканата, а при тоа истакна дека му претставува особена чест и задоволство бидејќи првпат сослужува со архијереј од Македонската Православна Црква – Охридска Архиепископија токму во Делчево. Двајцата архијереи изразија надеж дека во иднина ќе имаат уште многу заеднички братољубиви сослужувања.
На самиот ден на празникот, 28 / 15 август во истиот храм беше отслужена света Божествена Литургија.
На Литургијата началствуваше Митрополитот Неврокопски, а му сослужуваше Епископот Делчевско-каменички, заедно со повеќе свештеници од епархијата, како и гостинот од Неврокопската Митрополија свештеникот Ѓорѓи Kоцарев.
По читањето на Евангелието, Митрополитот Серафим одржа пригодно слово во чест на Пресвета Богородица, а при тоа не испушти, да заблагодари за укажаната чест и за братољубивата покана за заедничко сослужување.
На Литургијата верниот народ ги прими Светите Божествените Дарови.
На богослужбата, Епископот Марко го ракопроизведе во протоѓаконски чин досегашниот ѓакон Никола Мајсторски. Аксиос! Достоен! Бог и понатаму нека го укрепува и утврдува во верата растејќи и во Христа.
Извор: https://www.facebook.com/profile.php?id=61551990174842
