Фотографија: plusinfo.mk
„Со болка во срцата и со искрено сочувство, ја известуваме јавноста дека денеска, 25.11.2024, на споменот на Светиот Јован Милостив, се упокои во Господа нашиот возљубен архипастир, Неговото Високопреосвештенство Митрополитот Дебарско-кичевски г. Тимотеј.
Свештенството, монаштвото и верниот народ на Дебарско-кичевската епархија се обединети во молитвата за покој на неговата душа, со надеж на воскресение и светло блаженство. Неговиот живот и служба беа светол пример за пастирска љубов, пожртвуваност и посветеност кон Црквата Божја“ – известува Дебарско-кичевската епархија.
Утрово, со почеток во 9:00 часот, во храмот на Свети Климент Охридски на Плаошник беше отслужена заупокоена Света Архиерејска Литургија, началствуваше викарниот епископ на Дебарско-кичевската епархија, Неговото Преосвештенство епископот Антаниски г. Партениј.
Посмртните останки на Митрополитот Тимотеј ќе бидат изложени за проштално збогум од почетокот на Светата Литургија, па сѐ до крајот на вечерната служба истиот ден.
„Вечен ти спомен, достојнопочитуван и секогаш споменуван наш сакан архипастиру!“ – завршува соопштението од епархијата.
Извор: https://www.dke.org.mk/index.php/3710-se-upokoi-vo-gospoda-mitropolitot-debarsko-kichevski-g-timotej
