Бугарската Православна Црква ја одбележа 25-годишнината од канонскиот избор на Неговото Високопреосвештенство митрополитот Гаврил за поглавар на Ловчанската епархија со свечена Божествена Литургија, која беше отслужена на 1 февруари во соборниот храм „Свети Кирил и Методиј“ во Ловеч.
Со богослужбата началствуваше Неговата Светост Патријархот бугарски Даниил, во сослужение со митрополитот Гаврил и уште 15 архиереи, меѓу кои и Неговото Високопреосвештенство митрополитот Јоаникиј Црногорско-приморски од Српската Православна Црква. На богослужбата учествуваа и свештеници од цела Бугарија, како и архимандритот Нелуц Оприја, претставник на Романскиот Патријарх во Бугарија, известува Бугарската Православна Црква.
Во својата беседа, патријархот Даниил ја пофали обемната и плодна дејност на митрополитот во текот на изминатите четврт век, особено неговата посветеност на зачувувањето и проповедањето на православната вера. „Израснат под раководство на искусни духовни наставници… уште од младоста ја согледавте важноста и пресудното значење на чистотата на нашата вера за човечкиот живот и за неговото вечно спасение“, истакна патријархот.
Тој, исто така, ја истакна и дејноста на митрополитот Гаврил на полето на образованието, особено нагласувајќи го основањето на првото православно училиште во Бугарија – „Седмочисленици“, каде што „децата, заедно со квалитетното образование, ја добиваат и толку потребната воспитна насока во вечните и спасителни христијански вистини и вредности“.
Патријархот Даниил му врачи на митрополитот Гаврил архиерејски жезол од свое име и од име на Светиот Синод.
Митрополитот Гаврил Му заблагодари на Господ што му дал сила да го носи овој тежок крст, признавајќи дека патот „не беше ниту лесен, ниту без искушенија, но беше и пат на благодат, пат на средби со живата вера на Божјиот народ“.
Митрополитот Гаврил беше избран и канонски потврден за надлежен архиереј на Ловчанската епархија на 21 и 28 јануари 2001 година. Во текот на своето 25-годишно архипастирско служење, тој основа народни кујни, приватно православно училиште, објави десетици православни книги, изгради нови храмови и ги обнови манастирите и монашкиот живот во епархијата.
Извор: https://bg-patriarshia.bg/news/tarzhestvena-sveta-liturgia-po-povod-izpalvaneto-na-25-godin
