Оваа пролет, „Православните христијани за живот“ го спонзорираа 4-тиот годишен православен „Бејби Шауер“, кој се одржа во Риверсајд, Калифорнија, САД. Рекордни 90 парохии од осум православни јурисдикции се приклучија на иницијативата за поддршка на локалните жени кои се соочуваат со неочекувана или кризна бременост.
„Православните христијани за живот“ е непрофитна организација посветена на активирање на православната заедница да го живее учењето на Црквата за светоста на човечкиот живот, приклучувајќи се на движењето за спасување бебиња и поддршка на жените во кризна бременост. Ова се прави преку помагање на парохиите да формираат групи „за живот“ кои се молат, едуцираат и служат; преку снабдување на православните христијани со практични ресурси „за живот“; придонесување за мирно, молитвено присуство на маршеви за живот и надвор од установите за абортус и градење на врски помеѓу православната заедница и поширокото движење „за живот“.
Овој настан беше можност за православните парохии да соработуваат со непрофитни ресурсни центри за бременост (РЦБ), кои обезбедуваат бесплатна медицинска нега, материјални ресурси и постојана поддршка за бремените жени кои се во ранлива состојба, со цел да им помогнат да изберат живот.
Парохиите што учествуваа добија помош од „Православните христијани за живот“ за организирање на нивниот настан, собирајќи бебешки материјали за РЦБ во нивните локални заедници. Вкупно, оваа иницијатива мобилизираше над 1.000 луѓе да донираат:
- повеќе од 45.000 пелени
- речиси 11.000 пакувања со влажни марамчиња
- 12.146 долари во парични донации
- над 2.700 бебешки алишта (исклучувајќи чорапи и обувки)
- илјадници други бебешки предмети, вклучувајќи креветчиња, седишта за автомобили, колички, играчки и друго
Секоја година, националниот православен „Бејби Шауер“ поттикнува десетици нови партнерства помеѓу православните парохии и локалните РЦБ.
„Со оглед на тоа дека ресурсните центри за бременост беа изложени на зголемени напади и дезинформациски кампањи од активистите за права на абортус, овој настан е скапоцена можност за православните христијани да се обединат во поддршка на нивната вистинска мисија – помагање на мајките и бебињата,“ рече Емили Јокум, извршен директор.
„Благодарни сме за многуте парохии кои го осветлуваат благородното и несебично дело што овие центри го вршат секојдневно: поддршка за секоја жена во време на криза и помагање да се насочи напред кон пат што вклучува прифаќање на животот, наместо да стане жртва на индустријата за абортус.“
