„Ако не го казниш Тихик, ќе почнам да го спомнувам Онуфриј!“

Архиепископот Георгиј Кипарски и Патријархот Вартоломеј Цариградски

Во јавна беседа одржана на 29 јули 2025 година, познатиот протојереј, мисионер во Камерун и доктор по професија, отец Евангелиј Папаниколау, изнесе сериозно тврдење поврзано со случајот на Митрополитот на Пафос г. Тихик, од Кипарската Православна Црква, за што веќе пишувавме.

Отец Евангелиј сведочи: „На Кипар се зборува дека ‘големиот’ (се мисли на Архиепископот Кипарски Георгиј) вели: ако Патријархот (Вартоломеј Цариградски) не донесе одлука (во случајот со Митрополитот Тихик) како што сакам јас, тогаш ќе почнам да го спомнувам Онуфриј“ – се мисли на поглаварот на Украинската Православна Црква, Митрополитот Киевски и на цела Украина г. Онуфриј. Имено, откако Кипарската Црква во 2020 година ја потврди одлуката на тогашниот Кипарски Архиепископ Хризостом за признавање на ПЦУ (Православната Црква на Украина, чија автокефалија ја признаваат само 4 цркви), поглаварот на ПЦУ, Епифаниј, се спомнува на богослужбите наместо Онуфриј. Имено, откако Архиепископот Георгиј го разреши Митрполитот Тихик, Тихик се обрна кон Цариградскиот Патријарх како инстанца за апелација, и тој случај е сега во рацете на Патријархот Вартоломеј.

Но, како што посочува отец Евангелиј, Кипарскиот Архиепископ Георгиј не ја изговара оваа уцена кон Цариградскиот Патријарх Вартоломеј директно, туку преку блиски луѓе, за потоа да се извлече со тврдењето: „Јас тоа не сум го рекол“.

Оваа изјава, во која инаку би била тешко да се поверува, добива тежина токму поради авторитетот на отец Папаниколау, кој важи за исклучително доверлив сведок. Тој е клирик на Александриската Патријаршија и припаѓа на Митрополијата на Камерун. Изјавата може да се чуе на 24 минута на следната снимка: