Во Неделата на мироносиците, на 26 април 2026 година, храмот „Св. Георгиј“ во Искендерунскиот округ во Турција, го привлече целото внимание, облечен во ново пасхално руво, од една страна со посетата на Неговото Блаженство Антиохскиот Патријарх Јован, а од друга со хиротонијата на епископот Павле Ордологлу за епископ Тарсиски. Сето тоа наликуваше на спој на Рождество и Пасха, јасно изразен во Божествената Литургија што ја отслужи Патријархот Јован, во сослужение на архиереите: Атанасиј Латакиски, Ефрем Алепски, Арсениј Дахдалски, и Павле (Ордологлу), во присуство на митрополитот Игнатиј Француски и Западно и Јужно Европски, заедно со парохиските свештеници.
За време на Литургијата, Неговото Блаженство го одликуваше Николаос Папасоглу, парохиски свештеник во Искендерун, со свет крст, воздигнувајќи го во чин протојереј-ставрофор.
На крајот од Литургијата, митрополитот Ефрем Алепски одржа беседа, велејќи: „Во име на сите вас, го благословуваме Неговото Преосвештенство епископ Павле во неговата прва Литургија меѓу нас. Во ова благословено време ја живееме вистинската радост на Воскресението со благословот и присуството на Неговото Блаженство.“
Тој продолжи: „Возљубени, Воскресението за нас не е обичен настан, туку нешто што го живееме секој ден. Тоа ја изразува вашата љубов и волјата на Светиот Синод на Антиохија, кој исто така ја исполнува волјата на нашиот Господ воскреснат од мртвите.“
И додаде: „Денес ја празнуваме Неделата на жените мироносици, споменувајќи ги светите жени што донесоа мириси. Имаше многу такви жени кои Му служеа на Христос и на Неговите ученици од своите средства. Тие секогаш Го следеа Христос, без страв, украсени со храброст и сила. Оттука и нашата порака: ние сме деца на Воскресението и нашата вера ја надминува нашата слабост. Со вера сме уверени дека Христос може да го отстрани секој камен во нашиот живот. Затоа потврдуваме дека нашиот народ во Искендерунскиот округ е народ на Воскресението, а нивното животно мото е ‘Христос воскресе.’“
Господинот Џан Тимур, претседател на парохиското здружение во Искендерун, исто така се обрати: „Вашето присуство, Ваше Блаженство, ни дава голема сила и утеха. Денес живееме двојна радост: вашето присуство со архијереите на Светиот Синод на Антиохиската Патријаршија и поставувањето на епископот Павле Ордологлу, за да биде со нас и меѓу нас, та заедно да направиме преродба на епархијата.“
По неговиот говор, Неговото Блаженство, во име на парохијата во Искендерун, му подари на новоракоположениот епископ Павле енколпија со ликот на Пресвета Богородица.
На Литургијата присуствуваше и латинскиот епископ на Искендерун, Антоан Елгад.
