На покана на Патријархот Антиохиски и на целиот Исток г.г. Јован X, а во присуство на архијереите на Антиохиската патријаршија во Либан, на 10 октомври годинава се одржа состанок на православните претставници и членовите на парламентот на кој беа дискутирани тешките околности низ кои поминуваат Либан и Блискиот Исток.
Учесниците ја осудија војната што ја води Израел против Либан и неговите граѓани, придружена со атентати, убивање на невини граѓани, уништување, присилна миграција и раселување. Тие ги повикаа носителите на одлуки во светот да работат на запирање на тековното убивање кое однесе илјадници невини цивилни животи.
Учесниците ги повикаа сите либански пратеници веднаш да изберат претседател на Либанската Република во согласност со одредбите на уставот, претседател кој ќе ја врати регуларноста на институционалната работа во оваа земја, која со години страда од задушувачка економска криза, влошена од сегашната сурова војна.
Учесниците повикаа на итен прекин на огнот и да се работи за праведен мир, да се почитува суверенитетот и единството на либанските територии, да се почитуваат и спроведуваат меѓународните резолуции од страна на сите страни.
Учесниците апелираа до меѓународната заедница да побрза и да го запре масакрот над либанскиот народ и да ѝ подаде рака на либанската влада за да се промовира стабилност во земјата и да се обезбеди помош на погодените луѓе пред почетокот на зимата.
Учесниците изразија почит кон улогата на либанската армија во одржувањето на безбедноста и стабилноста, и им се заблагодарија на безбедносните сили за нивните напори во овие тешки услови. Тие исто така им се заблагодарија на организациите за помош и на медицинските центри за улогата што ја играат во ублажувањето на кризата со која се соочува либанскиот народ и повикаа на заеднички напори за прифаќање на раселените лица и обезбедување на условите за достоинствен живот. Тие ја нагласија важноста на националното единство во ова тешко време.
Учесниците упатија апел до светот да престане со поттикнувањето на криминалот што го погодува либанскиот народ преку пресушување на протокот на оружје што ги убива либанските граѓани.
Учесниците го повторија својот ангажман за работа кон воспоставување мир во Либан и обезбедување на сите услови за достоинствен живот за неговиот народ, кој заслужува безбеден и просперитетен живот.
