На 15 септември, во 12-та недела по Педесетница, денот на споменот на преподобните Антониј и Теодосиј Печерски и на светите благоверни кнез Петар и кнегиња Февронија Муромски, во храмот „Света Екатерина“ на Вспоље во Москва – Подворјето на Православната Црква во Америка – се одржаа прослави во чест на 200-годишнината од почетокот на мисионерската служба на Аљаска на светителот Инокентиј, подоцна митрополит Московски.
Божествената литургија на тој ден ја предводеше епископот Ситкински и Аљаскански Алексеј од Православна Црква во Америка, а му сослужуваа: протојереј Даниил Андрејук, старешина на храмот на Светата Екатерина на Вспоље – претставник на Православната Црква во Америка при Патријархот Московски и на сета Рус, протојереј Даниил Чарлс – секретар на Аљасканската епархија на Православната Црква во Америка и други свештенослужители.
Богослужбата се одржуваше на црковнословенски и англиски јазик, а исто така беа кажани возгласи и на јупик – јазикот на домородното население на Аљаска.
По отпустот беше возгласено многолетие за Светејшиот Патријарх Московски и на сета Рус Кирил и за Блажениот Архиепископ Вашингтонски, Митрополит на цела Америка и Канада Тихон.
Со благослов на Светејшиот Патријарх Московски и на сета Рус Кирил, епископот Ситкински и Аљаскански Алексеј е на поклоничко патување низ Русија по повод јубилејните прослави – 200-годишнината од почетокот на мисионерската служба на Аљаска на светителот Инокентиј Московски (тогаш свештеник Јован Вениаминов) во 1824 година.
Владика Алексеј изрази искрена благодарност до Светејшиот Патријарх Московски и на сета Рус Кирил и до Блажениот Митрополит Вашингтонски на цела Америка и Канада Тихон за можноста да го изврши ова поклоничко патување, кое за него станало вистински благослов, и ја истакна заедничката православна основа на Аљаска и Светата Рус, како и длабоките врски меѓу Аљасканската епархија на Православната Црква во Америка и Руската Православна Црква, посакувајќи ги нивното зацврстување со молитвите на светителот Инокентиј и другите светители од земјата Аљасканска.
Во текот на патувањето, беше посетена и Иркутската митрополија, каде што на 1 септември, архијерејот на Православната Црква во Америка учествуваше во соборната Литургија на плоштадот пред Казанската капела во Иркутск, а претходниот ден на сеноќното бдение во Богојавленскиот катедрален собор пред московската копија на иконата на Божјата Мајка „Казанска“ и моштите на светителот Инокентиј (Кулчицки). Богослуженијата ги предводеше митрополитот Иркутски и Ангарски Максимилијан.
На 2 септември, владиката Алексеј беше еден од гостите на свеченото отворање на академската година во православната гимназија во Иркутск, посветена на Рождеството на Пресвета Богородица.
На 5 септември тој присуствуваше на осветувањето на крстовите на Казанскиот храм во селото Голема река, извршено од митрополитот Иркутски.
Во истиот ден, гостите од Православната Црква во Америка учествуваа на тркалезна маса на тема „Свети Инокентиј и современоста“, одржана во изложбениот оддел „Прозорец кон Азија“ на Иркутскиот музеј. Епископот Алексеј раскажа за исповедништвото на православните на Аљаска, правејќи споредба меѓу периодот кога живееле под водството на свештеникот Јован Вениаминов (подоцна светителот Инокентиј Московски), времето по престанокот на руската управа над Аљаска и времето по револуцијата во Русија, забележувајќи ги разликите меѓу тие периоди. Исто така, говореше за современите проблеми на Православието на Аљаска. Секретарот на Аљасканската епархија, свештеник Даниил Чарлс, во своето излагање нагласи дека на Аљаска „човекот кој е крстен, веќе е наш брат: така се препознаваме и се обедуваме во нашите срца во Христа“.
На 6 септември 2024 година, во храмот на Свети Михаил и Свети Харлампиј во Иркутск беше отслужена Божествена литургија предводена од три архијереи: митрополитот Иркутски и Ангарски Максимилијан, епископот Ситкински и Аљаскански Алексеј и епископот Братски и Уст-Илимски Константин. По завршувањето на Литургијата беше свечено откриен споменикот на светите царски маченици – императорот Николај II и императорката Александра Фјодоровна – поставен пред храмот.
Покрај тоа, епископот Ситкински и Аљаскански Алексеј разговараше во Домот на младите со учесниците на проекцијата на документарниот филм „Света Аљаска“, снимен од американскиот документарист и ипоѓакон на Богојавленскиот храм во Колорадо-Спрингс (Православна Црква во Америка), Сајмон Сционка. Филмот ја раскажува историјата на Православието на Аљаска и светителите на таа земја, вклучувајќи го и преподобниот Герман Аљаскански, светителот Инокентиј Московски, преподобниот Јаков Нецветов, како и новопрославената блажена Олга Аљасканска.
На 13 септември, владиката ја посети Свето-Троицката Сергеевска лавра и Московската духовна академија. Гостинот од Православната Црква во Америка, заедно со игуменот на обителта, епископот Сергиевопосадски и Дмитровски Кирил, учествуваше во Божествената литургија во Успенскиот собор на Лаврата.
По завршувањето на Литургијата, игуменот се обрати до верниците со архипастирска порака, претставувајќи го епископот Ситкински и Аљаскански Алексеј, истакнувајќи: „Православните христијани на Аљаска го почитуваат светителот Инокентиј (Вениаминов), чии мошти почиваат тука, во Успенскиот собор – тој не е само митрополит Московски, туку и апостол на Сибир и Аљаска, апостол на Америка“.
Архипастирите се помолија соборно пред моштите на светителот Инокентиј Московски.
Во продолжение на посетата, владиката Алексеј се сретна со студентите на Московските духовни школи и во своето обраќање ги запозна со историјата на утврдувањето на Православието на Аљаска, како и ги сподели своите размислувања за животот на Православната Црква во Америка во современи услови. По беседата, студентите имаа можност да поставуваат прашања. После разговорот со студентите, владиката го посети Музејот на Московската духовна академија.
На 16 септември 2024 година, во Одделот за надворешни црковни врски (ОНЦВ) на Московската Патријаршија, епископот Алексеј се сретна со претседателот на ОНЦВ, митрополитот Волоколамски Антониј.
Со срдечно добредојде за гостите, претседателот на ОНЦВ пренесе поздрави до Претстојателот на Православната Црква во Америка, Блажениот Митрополит Тихон.
Учесниците на средбата ја разгледаа темата за одбележувањето на значајниот јубилеј, кој ќе се слави во 2025 година – 100-годишнината од упокојувањето на светителот Тихон, Патријархот Московски и на сета Рус, кој одиграл голема улога во ширењето на Православието на северноамериканскиот континент.
Во текот на разговорот беше дискутирана ситуацијата во православниот свет. Беше спомената и темата за прогоните на Украинската православна црква.
