На 5 октомври 2025 година, делегацијата на Руската Православна Црква, предводена од митрополитот Волгоградски и Камишински Теодор, која го посети Либан со благослов на Светејшиот Патријарх Московски и на сета Руса Кирил и по покана на митрополитот Филиполски Нифон од Антиохиската Патријаршија, учествуваше на Божествената Литургија во храмот посветен на иконата на Пресвета Богородица „Неочекувана Радост“ во градот Захле.
Богослужбата ја предводеше митрополитот Захлески и Баалбечки Антониј, сослужувајќи со митрополитот Волгоградски и Камишински Теодор, со претставникот на Антиохиската Православна Црква при Светејшиот Патријарх Московски и на цела Русија — митрополитот Филиполски Нифон, со претставникот на Руската Православна Црква при Патријархот на Голема Антиохија и на целиот Исток — архимандрит Филип, со старешината на храмот на свети Николај во градот Сајда — протоереј Јосиф Хури, со свештеникот на Волгоградската митрополија протоереј Вјачеслав Патрин и со свештенството на храмот.
Литургијата се служеше на арапски и на црковнословенски јазик.
Во храмот се молеа и министерот за одбрана на Либан Мишел Менаса, пратеникот на Парламентот од градот Захле Илијас Естефан, пратеникот од Западна Бекаа Гасан Скаф и поранешниот потпретседател на Парламентот Ејли Ферзли.
По отпустот на Божествената литургија, со поздравно слово се обрати митрополитот Захлески и Баалбечки Антониј, истакнувајќи, меѓу другото:
„Денес, собрани за заедничко богослужение, ја почувствувавме радоста на Небесното Царство, радоста на единството во Христос Исус и радоста на евхаристиското општење. Се молевме и на арапски и на црковнословенски, ги слушнавме богослужбените песнопенија на двата јазика и почувствувавме вистинско црковно единство. Тоа за нас е навистина голема радост. Особено е значајно што сме во овој благословен храм посветен на иконата на Пресвета Богородица ‘Неочекувана Радост’, подигнат со трудовите на митрополитот Нифон, за радоста да се разгласува не само во Захле и во долината Бекаа, туку во целиот Либан. А денес радоста на овој храм, преку владиката Теодор и прекрасниот хор што дојде со него, стигна и до Русија. Ги слушавме двата хора како пеат заедно, и чувствувавме дека Светиот Дух престојува и дејствува во нас.“
Извор: https://representation-damascus.org/иерарх-русской-православной-церкви-п/
