Православната Црква во Америка објави посебна Благодарствена богослужба кон Семоќниот Бог по повод 250-годишнината од Соединетите Американски Држави, ставајќи го текстот на располагање за употреба во текот на целата јубилејна година. Објавувањето следува по соопштението на Светиот архијерејски синод, усвоено на пролетното заседание во 2026 година, со кое православните верници беа повикани годишнината да ја одбележат со молитва, благодарност, покајание, милосрдни дела и обновена посветеност на Евангелието, за што пренесовме.
Новообјавената богослужба е наменета за широка употреба низ целата Православна Црква во Америка, вклучително и во епархиите, парохиите, манастирите, богословиите, црковните установи и во домовите на верниците. Црковните раководители ги охрабрија и свештенството и мирјаните да ги вклучат овие молитви во одбележувањето на јубилејната година, вознесувајќи благодарност за Божјите благослови и молејќи се за Неговото понатамошно раководство и заштита врз државата и нејзиниот народ.
Текстот на богослужбата во голема мера се темели на службата што Православната Црква во Америка ја подготви по повод двестегодишнината од независноста на Соединетите Американски Држави во 1976 година. Иако го зачувува духот на благодарност што го одбележа тогашното црковно прославување на 200-годишниот јубилеј, преработеното издание е приспособено на современите околности со кои се соочуваат и Црквата и американското општество.
Покрај богослужбените текстови, брошурата ја содржи и официјалната изјава на Светиот Синод по повод годишнината, со што дополнително се нагласува повикот на архијереите за духовно преиспитување и молитвено одбележување на овој јубилеј. Изданието е достапно и во дигитален PDF-формат, како и во верзија подготвена за печатење, со цел локално умножување и дистрибуција.
Извор: https://www.oca.org/news/headline-news/orthodox-church-in-america-publishes-service-of-thanksgiving-for-the-well-being-of-the-nation преку: https://uoj.news/news/oca-publishes-thanksgiving-service-for-americas-250th-anniversary/
