На 21 и 22 мај 2026 година, во Турција беа отслужени свечени богослужби за верниците на Московската Патријаршија на две големи христијански светилишта – на местото на погребението на светиот апостол и евангелист Јован Богослов во Селчук кај Ефес и во Мира Ликиска, поврзана со свети Николај Чудотворец.
На 21 мај, на празникот Вознесение Господово и денот на споменот на свети Јован Богослов, свештеникот Георгиј Сергеев, одговорен за пастирската грижа за паствата на Московската Патријаршија во Турција, отслужи Божествена литургија во базиликата на местото на погребението на светиот апостол во турскиот град Селчук, во близина на древниот Ефес.
На Литургијата молитвено учествуваа поклоници од Анкара, Измир, Кушадаси и Дидим, како и руски државјани кои престојуваат во Турција. Верниците се причестија со Светите Христови Тајни, а на сугубата ектенија беа вознесени посебни прозби и молитва за Света Русија.
Следниот ден, на 22 мај, кога Црквата го одбележува споменот на пренесувањето на моштите на свети Николај Мирликиски во Бари, отец Георгиј Сергеев отслужи Божествена литургија и молебен во храмот посветен на иконата на Пресвета Богородица „Знамение“ во Мира Ликиска, денешен Демре.
Во богослужението сослужуваа протојерејот Максим Приходко, кој се грижи за заедниците на Руската Православна Црква во Анталија, и свештеникот Димитриј Богатир, кој ја опслужува паствата во Алања. На богослужението присуствуваа повеќе од 200 поклоници од различни делови на Турција и Русија.
По Литургијата беше отслужен молебен во чест на свети Николај Чудотворец, а потоа и заупокоена литија за Андреј Карлов, вонреден и ополномоштен амбасадор на Руската Федерација во Турција, кај меморијалот покрај храмот во Демре.
Според телеграм-каналот на заедниците на Руската Православна Црква во Турција, свештеникот Георгиј Сергеев упатил благодарност до Министерството за култура и туризам на Турција за дозволата за одржување на богослужбите, како и до локалните организации и здруженија кои помогнале во организацијата на поклоничките патувања и црковните собири.
Извор: https://t.me/roc_turkiye/1156 и https://t.me/roc_turkiye/1141
