Во неделата, на 6 јули 2025 година, на Богословскиот факултет во Киншаса при Православниот универзитет на Конго, се одржа свечена церемонија за доделување на дипломите на дипломираните студенти.
Утрото беше отслужена Божествена Литургија во храмот „Св. Атанасиј Атонски“ при Богословскиот факултет, на која началствуваше Неговото Високопреосвештенство Митрополитот на Киншаса г. Теодосиј од Александриската Патријаршија, заедно со мноштво свештеници.
Беседа изрече директорот на интернатот, ѓаконот Никодим. Со хорот на црковните псалти раководеше високоучениот музиколог и атонски монах отец Кукузелис.
По завршувањето на Литургијата, целиот манастир и Богословскиот факултет ги пречекаа Амбасадорот на Грција во Конго, градоначалникот на Киншаса, и претседателот на Грчката заедница во Киншаса. Митрополитот топло ги поздрави високите гости по што следеше свеченоста на доделување на дипломите во салата за настани.
Првиот дел од свеченоста беше посветен на раскажувања од животот и учењето на св. Григориј Богослов, а во вториот дел претставник на студентите се обрати со благодарност кон Митрополитот, раководството на факултетот, Грчката амбасада, Грчката заедница во Киншаса, Православниот христијански мисионерски центар со седиште во САД, како и мисионерските здруженија од Грција – „Братството за надворешна мисија во Солун“ и „Здружението Св. Космас Солун“, кои постојано ги поддржуваат потребите на факултетот.
Потоа следеа обраќања од сите почесни гости, а во четвртиот дел беше извршено прогласување на дипломираните теолози и свечено доделување на нивните дипломи. Во завршниот дел на настанот, Митрополитот ги пренесе благословите и честитките од Неговото Блаженство Папата и Патријарх на Александрија и цела Африка, г.г. Теодор II.
