Естонскиот парламент на 17 септември 2025 година изгласа да го усвои „Законот за цркви и верски заедници“ без измени по трет пат, откако претседателот Алар Карис двапати одби да го прифати. Законот има за цел да ја забрани Естонската Православна Христијанска Црква поради нејзината поврзаност со Московската патријаршија.
Законот беше изгласан со 63 гласа „за“, 15 „против“ и 9 „воздржани“. Други 14 пратеници беа отсутни од седницата, известува Естонската државна радио-телевизија.
Бидејќи парламентот го усвои законот непроменет по трет пат, претседателот сега мора или да го прифати, или да поднесе барање до Врховниот суд за да го прогласи за неуставен.
Законот, чија цел е да ги прекине административните врски меѓу верските организации во Естонија и странски субјекти кои се сметаат за закана за националната безбедност, првпат беше усвоен од парламентот на 9 април. Претседателот Карис одби да го потпише на 24 април и го врати назад кај законодавците. По направените измени, парламентот усвои ревидирана верзија на 18 јуни, но претседателот повторно одби да го прогласи на 3 јули, изјавувајќи дека измените се недоволни.
За време на последната дебата, претседателот на Уставниот комитет истакна дека претседателот признал оти прекинувањето на опасните административни врски е веројатно уставно и се согласил со главната цел на Законот, но поставил прашање кои доктринални врски може да останат и кои мора да се прекинат.
„Овие законски измени не ја ограничуваат ничија верска слобода, измените не забрануваат ниту една верска деноминација во Естонија, не затвораат ниту една црква, парохија, манастир или сојуз на парохии,“ изјави претседателот на Комитетот за правни прашања Мадис Тимпсон, иако Законот очигледно е насочен кон затворање на цела јурисдикција.
Игуменијата Филарета од Пјухтицкиот манастир упати писмо до парламентот во февруари:
„Без сомнеж, совршено добро разбирате — со одобрување на измените на законот, вие го ставате манастирот надвор од законот, давајќи само две опции: или промена на јурисдикцијата, или присилна ликвидација — совршено добро разбирате дека со своите постапки вие всушност го затворате манастирот. Навистина ли сакате да влезете во историјата како пратеници кои присилно го прекинале постоењето на познат православен женски манастир во Естонија кој постои повеќе од сто години?“
Она што таа го пишува за својот манастир, подеднакво важи и за целата Естонска Православна Христијанска Црква.
Обновената постапка на Парламентот доаѓа само неколку дена откако претседателот Карис ја повтори својата загриженост за уставноста на законот во говорот за отворањето на есенската сесија на парламентот.
Извор: https://www.err.ee/1609803489/riigikogu-otsustas-kirikute-ja-koguduste-seaduse-muutmata-kujul-vastu-votta преку: https://orthochristian.com/172698.html
