Руската Федерална служба за безбедност (ФСБ) смета дека главната цел на киевскиот режим во планирањето атентат врз Неговото Високопреосвештенство Митрополит Тихон (Шевкунов) од Симферопол и Крим, претходно годинава, за што известивме, била да ги наруши преговорите меѓу Русија и САД за решавање на украинскиот конфликт.
„Според експертите, главната цел на овој диверзантско-терористички акт била попречување на преговорите меѓу Русија и САД по прашањето за решавање на украинскиот конфликт. Истовремено, киевскиот режим сметал дека, доколку терористичкиот напад врз Митрополит Тихон успешно се изврши, руската страна ќе биде принудена да се откаже од мировните разговори“, соопшти ФСБ во средата, пренесува руската новинска агенција „РИА-Новости“.
ФСБ објави дека добила нови докази против осомничените во случајот за време на истрагата и сослушувањата спроведени во вторник, 11 ноември, во Москва, Псковската област и Крим — места каде што служел митрополит Тихон.
Истрагата спровела претреси и сослушувања кај лица од блиското окружување на обвинетите. ФСБ соопшти дека се добиени докази што ја потврдуваат вмешаноста на Денис Попович и Никита Иванкович во делата за кои се обвинети. Запленети биле и пропагандни материјали на терористичка организација забранета во Русија.
ФСБ првично објави на 28 февруари годинава дека спречила терористички напад во Москва против митрополит Тихон, напад за кој се верува дека бил планиран од украинските разузнавачки служби. Според безбедносната служба, атентатот го подготвувале неговиот асистент, украинскиот државјанин Денис Попович, и московскиот чтец Никита Иванкович. Се смета дека осомничените биле регрутирани од Главната управa за разузнавање на Украина преку каналот за комуникација Телеграм. Според безбедносните органи, импровизирана експлозивна направа им била тајно доставена во декември 2024 година.
Нападот бил планиран да се изврши додека митрополит Тихон престојувал во Москва. Приведениот асистент Попович изјавил дека експлозивната направа требало да биде поставена во Сретенскиот манастир во центарот на Москва. Тој рекол дека му се заканувале со убиство на блиски роднини доколку одбие да го изврши нападот. По извршување на злосторството, осомничените планирале да ја напуштат Русија користејќи фалсификувани документи. Кај нив биле запленети импровизирана експлозивна направа и два фалсификувани украински пасоши.
Извор: https://ria.ru/20251112/tikhon-2054386753.html преку: https://orthochristian.com/173955.html
