Коптскиот патријарх во посета на Цариградската Патријаршија

Цариградскиот Патријарх Вартоломеј, во Неделата на мироносиците, на 26 април 2026 година, началствуваше на Божествената Литургија, во Патријаршискиот храм во Фанар.

На Литургијата присуствуваше Патријархот на Коптската Црква Тавадрос, кој се наоѓа во официјална посета на Цариградската Патријаршија. Во текот на службата, тој ја прочита Господовата молитва на арапски јазик.

На крајот од Литургијата, Патријархот Вартоломеј упати срдечен поздрав до Коптскиот Патријарх, кој возврати во ист братски дух. Во своето обраќање, Цариградскиот Патријарх го нагласи постигнатиот напредок во богословскиот дијалог меѓу двете Цркви.

Цитирајќи го псалмскиот стих: „Еве колку е добро и убаво кога браќата живеат заедно“, нагласи дека оваа средба е „жива одек на таа вистина“, а присуството на коптскиот претстојател го нарече плод на Божјата промисла.

Говорејќи за односите меѓу двете Цркви, истакна дека по долгогодишниот богословски дијалог станало јасно дека „нашето исповедање за тајната на Воплотувањето е, по суштина, едно и исто“, и дека историските поделби произлегуваат од „историски околности, јазични разлики и културни недоразбирања“.

Сепак, подвлече дека богословските заклучоци не треба да останат само теоретски: „не можат да се ограничат на текстови и комисии, туку треба да бидат прифатени и живеени во животот на Црквата“. Во тој дух, сегашната посета ја нарече повик „да преминеме од согласност кон прифаќање, од дијалог кон живот“.

Тој исто така ги призна постојните тешкотии, споменувајќи „пречки кои сè уште ја попречуваат целосната заедница“, меѓу кои и прашањето за анатемите, кое бара „внимателно и молитвено разрешување“.

Цитирајќи го апостол Павле – „вистинувајќи во љубов“, истакна дека „вистината без љубов разделува, а вистината со љубов го гради Телото Христово“, повикувајќи на надминување не само на богословските разлики, туку и на „историските и емоционалните тежини“.