Неговото Високопреосвештенство Митрополитот Лука Запорошки го осуди филмскиот фестивал со ЛГБТ содржина кој се отвори во Киев на Велики Петок и повика и другите верски лидери да го подигнат својот глас.
Фестивалот „Сончевото Зајаче“ се одржува на Велики Петок, Велика Сабота, Велигден и за време на целата Светла седмица. Според организаторите, целта на фестивалот е „тој да стане значаен претставник на украинската и меѓународната ЛГБТ заедница, да игра значајна улога во политичката и социјалната репрезентација и да поттикне промени кон еднаквост во украинското општество“, пренесува Сојузот на православни журналисти.
Но светите денови не смеат да се исмеваат, пишува митрополитот Лука на својот Телеграм канал.
Нашата вера нè повикува да ги сакаме сите, пишува тој, но „љубовта не може да биде рамнодушност. Вистинската љубов ја зборува вистината — со сочувство, но и со храброст. Бог го сака човекот, но го мрази гревот, така што изразот ‘Бог ги сака сите’ не е соодветен во вакви случаи.“
Тој продолжува: „Велики Петок е ден кога целиот христијански свет се сеќава на Христовата Жртва на Крстот за спасение на човештвото од гревот. Велигден е празник на победа над смртта, празник на светлина, чистота и живот. Користењето на овие денови за промовирање на идеологија која е во спротивност со христијанскиот морал е длабоко непочитување, не само кон верниците, туку и кон самата духовна суштина на човекот.“
„Овој фестивал не е ни злобна шега — туку вистински скандал“, пишува митрополитот.
Со оглед на тоа што ваквиот скандал се случува во свети денови, сосема е природно да се постави прашањето: каде е гласот на духовните водачи на Украина, се прашува митрополитот Лука. Со оглед на тоа колку важна отсекогаш била религијата во Украина, тишината од страна на духовните лидери е прегласна, пишува тој.
„Слушаме изјави за политички теми, за општествената структура и слично — и тоа е неопходно. Но каде е зборот за моралната корупција, која се претставува под маската на ‘уметност’? Каде е заштитата на светите симболи, каде е насоката до стадото, каде е татковскиот глас кој може да го запре лудилото?“
За жал, пишува тој, одговорот е очигледен — тие духовни лидери се „зафатени со поддршка на законски иницијативи насочени кон правно ‘убиство’ на мојата Мајка Црква, Украинската Православна Црква, молчаливо прифаќање на насилното заземање на нејзините цркви, тепање на верните чеда на Украинската Православна Црква кои ги бранат своите храмови, и гласна декларација дека прогонството на Украинската Православна Црква е ‘неверојатна верска слобода’.“
Митрополитот завршува: „Зошто нема заеднички глас на православни, католици, унијати, Евреи, муслимани, протестанти — гласот на разумот, верата и совеста? Зошто верата молчи кога неверието вика?“
