Моштите на свети Горазд по 1.200 години се вратија во Велика Моравија

На 8 август 2026 година, владиката Исаија, епископ на Оломоуцко-брнската епархија на Православната Црква на Чешките земји и Словачка, од Албанија донел дел од моштите на свети Горазд I, великоморавскиот епископ и ученик на светите Кирил и Методиј. Моштите биле положени во соборниот храм „Свети Горазд“ во Оломоуц, Чешка.

Оломоуцко-брнската епархија на својот канал на Јутјуб објавила видео од историскиот момент – положувањето на дел од моштите на свети Горазд во соборниот храм на епархијата.

Протојереј Алексеј Кухта во видеото го опишува значењето на настанот: „За празникот на нашиот храм, Бог нè благослови со голема работа – во нашиот храм да можат да бидат положени телесните мошти на свети Горазд, великоморавскиот епископ. За нашиот храм, за целата наша епархија, но и за цела Моравија и Чешката Република, ова е исклучителен и историски момент. Зашто Горазд, по повеќе од 1.200 години, се враќа на Велика Моравија.“

На добивањето на моштите му претходело долго патување во Албанија, каде што е погребан свети Горазд. „По долгогодишно размислување тргнав на пат во Албанија, каде што знаев дека е погребан свети Горазд. Затоа мислев дека ќе се поклонам, а можеби и ќе добијам од Црквата мошти за нашата катедрала, за нашата епархија“, објаснува епископот Исаија.

Ситуацијата, сепак, не била едноставна. Храмот во кој се наоѓаат моштите денес е музеј, а Црквата нема пристап до нив поради историската атеизација на албанската држава. „Албанскиот епископ кој ја извршуваше службата ни кажа дека откако живее и откако доаѓа таму, никогаш досега не ги видел тие мошти“, вели епископот Исаија.

Сепак, на крајот било овозможено да се земе дел од светите мошти.

„Тие ја видоа нашата желба не само да се помолиме, туку и да ги видиме моштите. Затоа, по големи молби, службениците од музејот ни дозволија да земеме дел од светите мошти, за Горазд да пребива во нашиот храм“, раскажува владиката.

Покрај моштите на свети Горазд, во храмот биле положени и мошти на свети Ангелариј, исто така ученик на светите Кирил и Методиј.

„За нас овој настан е многу значаен, бидејќи чувствуваме не само духовна поддршка од свети Горазд, туку сега и телесна. Свети Горазд, кој бил ученик на Кирил и Методиј и роден на Велика Моравија, сега повторно се враќа на ова подрачје и телесно, со своите мошти“, изјави епископот Исаија.