На 21 септември 2024 година, во Соборниот храм „Св. Архангел Михаил“ во Белград, Српскиот Патријарх Порфириј началствуваше со свечениот чин на наречение на новоизбраниот епископ Диоклиски, архимандрит Паисиј. На Патријархот му сослужуваше Тетовско-гостиварскиот митрополит Јосиф, заедно со: Митрополитот Тврски и Кашински Амвросиј од Руската Црква, Митрополитот Ловченски Гаврил од Бугарската Црква, Митрополитот на Керкира (Крф) Нектариј од Грчката Црква и повеќе архијереи на Српската Црква.
Пред присутниот собир на Светата Црква, архимандритот Паисиј ја прифати волјата и одлуката на Светиот архијерејски собор на Српската Православна Црква, кој на овогодишното заседание го избра за епископ Диоклиски, викар на Црногорско-приморскиот митрополит.
Хиротонијата на избраниот епископ ќе се изврши во недела, на 22 септември 2024 година во храмот „Св. Сава“ во Белград.
