Во новата учебна година во Видин вратите ќе ги отвори првото приватно црковно основно училиште во регионот, кое ќе го носи името „Митрополит Видински Неофит“. Ова за локалната телевизија Видин го изјави директорката на училиштето Лилија Ангелова. Годинава се запишуваат ученици за предучилишната група и во прво одделение.
Училиштето ќе биде сместено во зградата на таканареченото „Епархиско училиште“ во градот, што го изгради митрополитот Видински Неофит во 1934 година. Во моментов продолжува реновирањето во просториите наменети за основното училиште. Раководството уверува дека сè ќе биде готово до почетокот на учебната година.
Иницијативата за училиштето е на Видинската Митрополија и тоа е регистрирано како фондација. Покрај веронаука, интензивно ќе се изучуваат и математика и англиски јазик, рече г-ѓа Ангелова. Училиштето е акредитирано од Министерството за образование, и ќе се изучуваат сите задолжителни предмети, а свидетелствата што ќе ги издава ќе бидат целосно легални. Директорот истакна дека христијанските вредности и добрите односи меѓу децата ќе бидат меѓу приоритетите на педагошкиот тим.
Директорката рече дека граѓаните на Видин сè уште се сомничави во врска со новото училиште бидејќи не знаат што да очекуваат од тамошното образование. Надоместокот во приватното црковно училиште ќе биде околу 100 лева (приближно 3.000 денари) месечно, но првата година образованието во него ќе биде бесплатно, најави г-ѓа Ангелова. Ова е гест до родителите кои покажуваат храброст да ги запишат своите деца, рече директорката. Родители со скромни финансиски примања ќе можат и во иднина да бидат ослободени од плаќањето на овој надоместок. Таа истакна дека приватното училиште во Видин го следи искуството на приватното училиште во Ловчанската митрополија, што според неа дава добри резултати. Во училиштето ќе има и целодневна програма, и кетеринг.
На отворањето на училиштето се очекува да биде присутен и Бугарскиот патријарх Даниил.
Извор: vidin.tv преку https://dveri.bg/component/com_content/Itemid,100723/catid,14/id,73537/view,article/
