Светиот архијерејски синод на Бугарската православна црква на 21 март 2025 година објави апел за запирње на насилството и за заштита на правата и животите на христијанските малцинства во Сирија, Палестина, Појасот Газа и во целиот Блиски Исток.
Во продолжение во целост го пренесуваме ова обраќање.
Светиот Синод на Бугарската православна црква – Бугарска патријаршија, уште еднаш ја изразува својата безрезервна братска поддршка и солидарност со маченичката света Антиохиска патријаршија и нејзиниот поглавар – Неговото Блаженство Антиохискиот и на целиот Исток патријарх Јован X, како и со светата Сионска црква – Ерусалимската патријаршија и нејзиниот поглавар – Неговото Блаженство Ерусалимскиот патријарх Теофил III.
Во првата четвртина од XXI век, кога насекаде се зборува за човекови права, за слобода на личноста и за заштита на правата на малцинствата, целиот свет останува рамнодушен сведок на трагичните настани што се случуваат на Блискиот Исток. Сведоци сме на тоа како цивилни, невооружени и беспомошни луѓе – стотици мажи, жени, деца и старци, се мачени, понижувани, силувани и убивани на најсвиреп и нечовечен начин во Сирија и во други соседни земји од Блискиот Исток. Не можеме да останеме рамнодушни и неми пред страдањата, болките и маките кои ги трпат илјадници наши браќа и сестри!
Во овие денови на Великиот пост ги повикуваме сите православни христијани од епархиите на Бугарската православна црква – Бугарска патријаршија на усрдна и секојдневна молитва на колена за нашите браќа и сестри христијани во Сирија, историската област Палестина, Појасот Газа и во целиот Блиски Исток, како и за секое невино човечко суштество кое страда од војна, несигурност, неправда и насилство.
Апелираме до одговорните меѓународни и национални фактори и организации да направат сè што е во рамките на нивните човечки сили и можности за итно запирање на насилството и за заштита на правата и животите на христијанските малцинства во Сирија и на целиот Блиски Исток.
Молитвено Му се обраќаме на Господа и Владиката на нашиот живот, Кој е нашата единствена надеж, утеха и надеж, по молитвите на Својата Пречиста Мајка и на сите Свои светии, да подари мир на целиот свет!
Извор: https://bg-patriarshia.bg/news/obrashtenie-na-sv-sinod-otnosno-tragichnite-sabitia-v-blizki
