Цариградскиот Патријарх Вартоломеј на 24 октомври 2025 година, пристигна во Романија, за да учествува во осветувањето на мозаиците на романската национална катедрала во Букурешт. Националната Катедрала се смета дека е најголемиот православен храм во светот. Посветен е на Вознесението Господово и на свети Андреј Првоповикан, заштитникот на Романија. Темелите на храмот се поставени во 2010 година, а храмот е изграден во 2018 година, кога беше осветен олтарот, исто така од страна на Цариградскиот Патријарх Вартоломеј и Романскиот Патријарх Даниел.
Годинава Романската Православна Црква го прославува и јубилејот – 140 години од добивање на томосот за автокефалија од Цариградската Патријаршија и 100 години од нејзиното воздигнување во ранг на Патријаршија.
Во своето поздравно обраќање, Романскиот Патријарх Даниел истакна дека доаѓањето на Цариградскиот Патријарх претставува „момент на голем благослов, духовна радост и зацврстување на заедништвото помеѓу Вселенската Патријаршија и Романската Патријаршија“ и дека „љубовта на Неговата Светост кон светителите ги зближува сестринските Православни Цркви“.
Осветувањето беше извршено на 26 октомври. Во сослужувањето при чинот на осветување учествуваа членови на Светиот Синод на Романската Православна Црква, 67 свештеници и 12 ѓакони. Пред тоа, беше отслужена Божествена Литургија од патријаршиските викарни епископи Варлаам од Плоешти, Паисиј од Синаја и помошниот епископ Тимотеј од Прахова од Архиепископијата на Букурешт.
На службата присуствуваа претседателката на Молдавија Маја Санду и претседателот на Романија Никушор Дан, како и членови на нивните семејства. Присутни беа и Н.В. Маргарета, чуварот на романската круна, принцот Раду, поранешни претседатели Емил Константинеску и Трајан Басеску, државниот секретар за верски прашања Кипријан Олиничи, дипломатски претставници, други верски заедници и културни и општествени институции.
Над 8.000 свештеници и верници од епархиите на Романската Православна Црква се собраа пред Националната катедрала за да го сведочат овој историски настан.
Во своето благодарствено обраќање при осветувањето, Романскиот Патријарх, помеѓу останатото, истакна:
„Ја изразуваме нашата длабока благодарност кон почитуваните државни власти на Романија за нивната административна и финансиска поддршка во изградбата на Катедралата на народното спасение: кон последователните Влади на Романија од 2011 до 2025 година, Општината Букурешт, други општински власти од главниот град и од целата земја, како и кон различни окружни совети.
Исто така, им благодариме на сите добротвори и спонзори, анонимни донатори и на оние кои побараа да бидат спомнувани на Светиот Престол заедно со своите семејства, за нивната великодушна поддршка во исполнувањето на овој романски идеал, во оваа година од големо значење — стогодишнината на Романската Патријаршија.
Денес, на крајот од благословувањето на живописот на Националната катедрала, сакаме да им заблагодариме на сите архиереи, сите свештеници и ѓакони, сите монаси и монахињи и на сите верници — и во Романија и во странство — на Романската Православна Црква, за нивната духовна и материјална поддршка во ова дело на нашата Црква. На сите ним им упатуваме нашиот патријаршиски благослов и љубезно ги молиме, преку молитва и добротворност, да продолжат да ни помагаат да ги завршиме сите преостанати работи на Националната катедрала, вклучувајќи ја Капелата и мултифункционалните простории на пониското ниво на Катедралата“.
