Моштите на неодамна канонизираниот Свети Хризостом Мисионерот беа свечено откриени во неделата, на 22 март. Чинот го предводеше Александрискиот Патријарх Теодор II, заедно со архијереи и свештенослужители од други епархии на Александриската Патријаршија, известува црковниот портал „Ортодоксиа пост“.
„За православните верници во Демократска Република Конго, овој настан има особено значење. Присуството на моштите на свети Хрисостом меѓу нив служи како потсетник дека нивната земја е благословена со животот и мисијата на еден свет мисионер, кој се трудел за спасение на душите“, пишува медиумот.
Свети Хризостом Папасарантопулос (1903–1972), родум од Грција, бил еден од пионерите на православната мисионерска дејност во Африка. Тој ја основал православната мисија во Конго, а неговото дело се проширило во Колвези, Касенга, Кананга и Киншаса. Десет години пред својата работа во Конго, проповедал во Уганда, Кенија и Танзанија, каде што градел цркви и привел многумина кон верата. Во поодмината возраст и со нарушено здравје, тој заминал сам од Атина за да ги евангелизира домородните африкански заедници, потпирајќи се на својата вера и љубов кон луѓето, наместо на материјални средства.
Тој беше канонизиран на 8 октомври 2025 година од Светиот синод на Александриската Патријаршија, како што известивме.
Моштите на свети Хризостом ќе останат во Кананга како место за почитување и поклонение за православните верници од Демократска Република Конго и поширокиот регион.
„Овој историски ден претставува силно сведоштво за живата и растечка православна вера во Африка — вера негувана преку мисионерска посветеност, зајакната со жртва и одржувана преку молитвите на светителите“, заклучува „Ортодоксиа пост“.
