Патријархот на Романската православна црква г.г. Даниил им го честиташе на учениците, родителите, наставниците и воспитувачите почетокот на учебната 2024-2025 година. Тој ја истакна важноста на христијанското образование, нарекувајќи го „светлина за општеството“ и суштинско за духовниот раст на личностите во заедница со Бога.
Во продолжение следува целосниот текст на обраќањето на патријархот Даниил, по повод почетокот на учебната 2024/2025 година.
Христијанското образование е светлина за општеството
На почетокот на учебната 2024-2025 година, упатуваме честитки и благослови до учениците, родителите, дедовците и бабите, наставниците и воспитувачите, повикувајќи ги со родителска љубов, да го вреднуваат и негуваат христијанското образование во семејството, во црквата и во училиштето.
Христијанското образование се фокусира на духовното растење на личностите во заедницата на љубов со Бога. Основата на христијанскиот живот е Воплотувањето на Синот Божји, Кој стана човек за да му понуди на човештвото можност да постигне сличност (подобие) со Бога, светост и совршенство. Затоа, Господ Исус Христос заповедал: „Бидете совршени, како што е совршен вашиот Отец небесен“ (Мт 5, 48).
Човекот не може да се стреми кон овој идеал без Божја помош: „Оној што е во Мене, и Јас во него, тој ќе даде многу плод; оти без Мене не можете да направите ништо“ (Јн 15, 5). Како прво средство за постигнување на совршенството на човекот му била дадена можноста за соединувањето со Христос во Светата Тајна Крштение, што му овозможува на човекот да се бори против гревот и да ја негува добродетелта, бидејќи човекот е повикан на заедница на љубов со Бога и со ближните.
Бидејќи принципите на христијанското образование се засноваат на Светото Писмо, кое е вдахновено од Светиот Дух, познавањето на откриеното учење е услов за водењето на детето по патот на духовното растење.
Христијанското образование се одвива во рамките на семејството, црквата и училиштето. Во семејството, пренесувањето на верата го олеснува првенствено примерот на родителите, дедовците и бабите, додека во црквата и училиштето, тоа се поддржува со трпението, мудроста и љубовта на ученикот и на наставникот по веронаука.
Како што светлината ги открива во темнина дотогаш непознатите луѓе и предмети, така и училишниот предмет Веронаука и парохиската катехизација го промовираат подлабокото разбирање на реалноста на животот и светот. Тие придонесуваат за намалување на негативните ефекти од современата криза на идентитет и на ориентација, го нудат моделот на добрина и светост и им помагаат на учениците да ја разберат историјата и културата на нашиот континент.
Христијанското образование, негувано во црквата и во училиштето, исто така, е неопходно за хармонично живеење во семејството и во општеството, како што поттикнува св. апостол Павле: „Како избраници Божји, свети и возљубени, облечете се во милосрдност, доброта, смиреност, кротост и долготрпеливост… А над сето тоа облечете се во љубов, која е врска на совршенството… Словото Христово изобилно нека се всели во нас; во секоја мудрост да се учите и да се советувате еден друг“ (Кол 3, 12,14,16).
Го молиме Господ Исус Христос, нашиот „Учител“ (Мт 23, 10) и „Спасител“ (Тит 1, 4), да ги просвети душите на учениците, родителите, дедовците и бабите, учителите и воспитувачите, за да можат да донесат многу плод во нивните семејства и во општеството.
Со многу благодарност и родителски благослов,
Даниил,
Патријарх на Романската православна црква
