Десеттата Национална конференција на центрите за поддршка на бремени жени, одржана во октомври 2024 година, ја нагласи важноста на обезбедувањето на доследна грижа и помош за идните мајки и младите семејства. Во својата порака на настанот, Даниел, патријархот на Романската православна црква, ја истакна суштинската улога на овие центри во одбраната и промовирањето на животот, особено во општеството кое брзо се менува и често ги предизвикува традиционалните семејни структури.
Во продолжение, прочитајте го целосниот текст на пораката на патријархот Даниел.
Поддршката на бремените жени и младите мајки е дело на одбрана и промовирање на животот
Организирањето на Десеттата Национална конференција на центрите за поддршка на бремени жени во октомври 2024 г. одразува доследност, комуникација и солидарност во областа што има големо значење за денешното општество.
Брзите промени во современите општества ширум светот – економската глобализација, технолошкиот напредок и мобилноста на населението – значително влијаеа на традиционалните семејства, создавајќи ранливост во континуитетот меѓу генерациите.
Во овој контекст, грижата за светиот дар на животот и поддршката на оние кои се соочуваат со предизвици во време кога треба да го чувствуваат Божјиот благослов, Изворот на животот и Заштитникот на децата, носи зраци на љубов и надеж преку дејствување. Поддршката на бремените жени и младите мајки е дело на одбрана и унапредување на животот.
Според нашата вера, раѓањето на секое човечко битие е дар од Бога, кој мора да се прими и да се чува со благодарност во светлината на нашиот Господ Исус Христос, Кој е „Патот, Вистината и Животот“ (Јн 14, 6). Професионализацијата на активностите за поддршка на бремените жени, на младите мајки кои се во тешки услови и на нивните семејства, придонесува за градењето на одржливи институции и за развојот на регионалните и националните мрежи. Тие мрежи можат да формираат партнерства со специјализираните јавни установи, да влијаат на јавното мислење за да се зголеми чувствителноста кон ранливите поединци и да се поттикне единство во дејствувањето за помош на младите од заедницата, на кои им е потребна помош.
Присуството на неколку црковни единици на национално ниво во мрежата на центрите за поддршка на бремените жени и на семејствата, го покажуваат вниманието на Романската православна црква кон оваа хуманитарна работа, која бара меѓу-институционално содејство и интердисциплинарна соработка.
Конференцијата, организирана оваа есен, дава одлична можност за споделување на конкретните резултати од досегашната работа, за размена на искуства и за истражување на нови програми за промовирање и примена на интегрирани услуги за поддршка на жените во време на бременоста и по породувањето.
Ви честитаме за вашата работа и упатуваме до вас благослов за почетокот на активностите на овој национален настан. Го молиме Бога, Изворот и Заштитникот на животот, да ви дарува здравје и сила да постигнете нови успеси во благородното дело на заштита и промовирање на човечкиот живот.
Со почит и благослов,
† Даниел, патријарх на Романската православна црква
