Во среда, 28 ноември / 11 декември 2024 година, поглаварите на христијанските Цркви во Ерусалим имаа средба во просториите на православната Ерусалимска патријаршија, под раководство на Неговото Блаженство Патријархот Ерусалимски г.г. Теофил III.
На средбата беше усвоена заедничка Божикна порака во која, помеѓу останатото, Поглаварите на Црквите во Ерусалим повикуваат за мир во Газа.
Во продолжение ја пренесуваме оваа порака во целост
Божиќна порака – 2024
„Народот што седеше во темнина виде голема светлина,
и за оние што седеа во смртната област и во сенка им изгреа светлина.“
(Матеј 4, 16; цитирајќи го Исаија 9,2)Во овие мрачни денови на континуиран конфликт и несигурност во нашиот регион, ние, Патријарсите и Раководителите на Црквите во Ерусалим, остануваме постојани во објавувањето на нашите локални заедници и на поширокиот свет за вечната Божиќна порака за Вистинската Светлина која свети во темнината: раѓањето на нашиот Господ Исус во Витлеем (Јован 1, 5).
Во Христовото Рождество, светлината на Божјото спасение првпат дојде на светот, просветлувајќи ги сите што ќе го примат, тогаш и сега, и нудејќи им „благодат врз благодат“ за да ги надминат темните сили на злото кои непрекинато се обидуваат да го уништат Божјото создание (Јован 1, 16).
Јован Крстител подоцна сведочеше за светлината како „глас на оној што вика во пустината: ‘Подгответе го патот Господов’“ (Јован 1, 23; Исаија 40, 3). Како што открива горниот пасус, неговите божествени зраци првпат заблескаа врз нашите духовни предци, кои ја примија пораката за спасение додека живееја „во област и сенка на смртта“ (Матеј 4, 16). Поминувајќи низ многу страдања, тие ја пренесоа Светлината на Христовото Воскресение, станувајќи негови сведоци во Ерусалим, низ Светата Земја и до краиштата на земјата.
Овој древен пат на искупување нè води до нашето време, кога војните сè уште беснеат, а безброј милиони во нашиот регион и низ светот продолжуваат тешко да страдаат. Надворешно, малку нешта изгледаат променети. Но, внатрешно, светото раѓање на нашиот Господ Исус Христос поттикна духовна револуција која продолжува да преобразува безброј срца и умови кон патиштата на правдата, милоста и мирот (Михеј 6, 8; Ефесјаните 2,17).
За оние семејства на верните кои останаа во Светата Земја, како и за оние кои ни се придружија, наша привилегија е да продолжиме да сведочиме за свештената светлина на Христос на местата каде што тој беше роден, проповедал и се жртвувал за нас, воскреснувајќи победнички од гробот во нов живот. Ова го правиме со тоа што Му принесуваме служба на светите места; со тоа што ги примаме поклониците и посетителите; со тоа што го разгласуваме Неговото свето Евангелие за сите што сакаат да слушнат; продолжувајќи ги неговите служби на поучување, лекување и љубовна добрина; и залагајќи се за „слобода за плениците и ослободување за затворениците“ (Исаија 61:1; Лука 4:18–19).
Во овој надежен Божиќен дух, му благодариме на Семоќниот за неодамнешниот прекин на огнот меѓу две војувачки страни во нашиот регион, и повикуваме тој да се прошири на Газа и на многу други места, ставајќи крај на војните кои го мачеа нашиот дел од светот. Исто така, ја обновуваме нашата молба за ослободување на сите затвореници, враќање на бездомниците и раселените, лекување на болните и ранетите, помош за гладните и жедните, обновување на неправедно одземените или загрозените имоти и реконструкција на сите јавни и приватни цивилни структури кои се оштетени или уништени.
На крај, за време на оваа света Божиќна сезона и понатаму, ги повикуваме сите христијани и луѓе со добра волја низ светот да ни се придружат во молитва и работа за оваа благородна мисија, и во Христовата татковина и каде и да има конфликт и страдање. Зашто, со тоа, навистина ќе го почитуваме Кнезот на мирот кој толку понизно се роди во јасли во Витлеем пред повеќе од две милениуми.
—Патријарсите и Поглаварите на Црквите во Ерусалим
