По светата Литургија, која на празникот на Светите цар Константин и царица Елена, на 3 јуни 2026 година, беше отслужена пред Чесниот Појас на Пресвета Богородица во храмот „Свети Сава“ во Белград, Неговата Светост, Српскиот Патријарх г. Порфириј, приреди прием за Високопреосветениот Архиепископ на Њујорк и Њу Џерси на Православната Црква во Америка, г. Михаил.
За време на приемот во Парохискиот дом на храмот „Свети Сава“, Неговата Светост му посака добредојде на архиепископот Михаил и на неговата придружба во престолнината, во деновите благословени со присуството на Чесниот Појас на Пресвета Богородица.
Архиепископот Михаил заблагодари за благословот да служи света Литургија со поглаварот на Српската Православна Црква и го запозна со програмата на неговото поклоничко патување од 2 до 13 јуни 2026 година, под наслов „По стапките на Светиот владика Николај Велимировиќ“, по повод 70-годишнината од упокојувањето на свети Николај Велимировиќ.
Архиепископот Михаил, кој е и ректор на семинаријата „Св. Тихон“ во Пенсилванија го извести Српскиот Патријарх и за постојаниот пораст на бројот на православните верници во САД. Соговорниците истакнаа дека сите сме повикани автентично да го сведочиме Христовото Евангелие, а дека дијалогот проникнат со вистина и љубов претставува еден од најважните облици на таквото сведоштво.
На состанокот присуствуваа: протојереите Јован Паркер, Данило Дегијански, Јован Витко и Јосија Тренам; протоѓаконот Јефрем Риверс; протојереј Ѓорѓе Стојисављевиќ, шеф на Кабинетот на Српскиот Патријарх; ѓаконот Никола Костиќ, секретар на Кабинетот на Српскиот Патријарх; ѓаконот Владимир Јовиќ и г. Борис Секулиќ, службеници на Кабинетот.
