Неговата Светост Бугарскиот Патријарх Даниил на 18 август 2024 година му испрати писмо со честитка за годишнината од восоличувањето на Неговото Блаженство Митрополитот Онуфриј Киевски и на цела Украина.
Во продолжение ова писмо го пренесуваме во целост.
Ваше Блаженство,
На денешниот датум, пред точно 10 години, беше извршено Вашето свечено востоличување за Митрополит Киевски и на цела Украина, после канонскиот избор, направен од епископите на Украинската православна црква. Во текот на овој десетгодишен период, Вие се утврдивте како достоен наследник на великите архијереи и исповедници кои служеле на Киевската митрополитска катедра. Вашата пословична скромност, смиреност, долготрпеливост, љубовта кон монаштвото и монашкиот начин на живот, како и стремежот кон строго почитување на канонскиот ред во Црквата што ни е завештан од светите отци, се карактеристични обележја на Вашето нелесно служење како поглавар на братската Украинска православна црква. Времето на Вашето првосветителство се совпадна со тешки искушенија за украинскиот народ и неговата Црква. Вие успеавте да ги издржите и продолжувате, со Божја помош, да им се спротивставувате на сите обиди за создавање поделби, зачувувајќи го единството, целоста и канонскиот карактер на Украинската православна црква. Истовремено, ова беа години на поделба во самото украинско општество, при што Вие секогаш се пројавувавте како обединител и миротворец – евангелска должност за секој вистински Христов пастир.
Ваше Блаженство,
Во последните години братската Украина минува низ страшниот оган на крвава војна. Сите ние усрдно се молиме за мирот во Украина, кој е важен услов и за мирот низ целиот свет. Ние се молиме лично за Вас, за семилостивиот Бог да Ви подари уште многу години во здравје, духовна расудливост и бодрост, за да ја раководите Украинската православна црква, која Ви е дарувана од Бога, за спасението, мирот и духовниот напредок на благочестивиот украински народ.
На многу и благи години, Ваше Блаженство!
Просејќи ги Вашите свети молитви, останувам на Ваше Блаженство со љубов во Христа брат,
Бугарски патријарх †Даниил
Извор: https://mitropolia-sofia.org/2024/08/18/писмо-на-негово-светейшество-българс-2/
