На 17 август 2024 година, по повод десетгодишнината од интронизацијата на Поглаварот на Украинската Православна Црква, Блаженејшиот Патријарх на Антиохија и на целиот Исток Јован X испрати честитка до Блаженејшиот Митрополит Киевски и на цела Украина Онуфриј. Ова го објави Информативно-просветниот оддел на Украинската православна црква.
„Срдечно Ве поздравувам, драги брате, по повод десетгодишнината од изборот од Светиот Собор на Украинската Православна Црква за носење на крстот на Поглавар и за служење на благочестивиот Божји народ во Украина, водејќи го по патот на спасението. Го молиме Семоќниот Бог, Отецот на милосрдието, да Ве зајакне во Вашето благословено служење, да Ве облее со Својата светлина и да ја умножи Својата благодат на Вас, за да ја чувате православната вера и нејзината чистота во овие тешки времиња, радувајќи се во надежта, поднесувајќи ги тешкотиите, останувајќи во молитва (Рим. 12, 12),“ се наведува во честитката.
Поглаварот на Антиохиската Црква истакна дека, примајќи вести за „прогонствата што ги трпи Вашата Црква, и за страдањата што ги носат нејзините епископи, свештеници, монаси и верни, кои сведочат за Христа и ја чуваат чистотата на верата, се потсетуваме на зборовите на Апостолот: ’Сите кои сакаат да живеат благочестиво во Исус Христос, ќе бидат гонети’ (2 Тим. 3, 12). Сепак, нè утешува тоа што знаеме дека Вие останувате непоколебливи во Вашата љубов кон Христа и сведочите дека ништо не може да нè оддели од љубовта Христова: ни страдање, ни притисок, ни прогонство, ни глад, ни голотија, ни опасност, ни меч (Рим. 8, 35).“
„Драги брате, бидете сигурни дека Антиохиската Црква Ве има Вас, Вашите исповедници и Вашите верни во своите молитви, молејќи Го Господа и нашиот Спасител Исус Христос да ѝ подари мир на Вашата земја, да ги избрише солзите од очите на Вашиот народ и да ја зачува Вашата Црква за навек. ’Самиот Господ на мирот нека ви даде мир секогаш и на секој начин. Господ нека биде со сите вас’ (2 Солуњаните, 3, 16),“ истакна Антиохискиот Патријарх.
Извор: https://www.antiochpatriarchate.org/ar/page/البطريرك-يوحنا-العاشر-في-رسالة-إلى-متروبوليت-كييف-أنوفريوس/2747/ преку: https://uoc-news.church/2024/08/18/blagajemo-gospoda-daruvati-mir-vashij-krajini-ta-zberegti-vashu-cerkvu-na-viki-vichni-patriarx-antioxiji-ioan-x-blazhennishomu-mitropolitu-onufriyu-u-10-richchya-intronizaciji/
