Во Неделата на светите отци на Првиот вселенски собор, на 24 мај 2026 година, со особена свеченост беше отслужена Божествена Литургија во храмот „Свети Александар“ на Грчката заедница на Лусака, Замбија, и околните области (Макени), со која началствуваше Неговото Блаженство Папата и Патријарх Александриски и на сета Африка г.г. Теодор II.
Неговото Блаженство беше придружувано од надлежниот архијереј, Високопреосвештениот митрополит Замбиски и Мозамбиски г. Јован, Неговото Преосвештенство епископот Џинџански и Источноугандски г. Силвестер, како и свештенослужители од Замбиската митрополија.
Присуството на Патријархот претставуваше особена благослов и извор на духовно укрепување за грчката и православната заедница во Лусака, која го пречека својот почитуван духовен отец со чувства на синовска љубов, длабока трогнатост, стравопочит и почитување – се вели во известувањето на грчкиот црковен портал „Ромфеа“.
За време на Патријаршиската Божествена Литургија, Неговото Блаженство упати зборови на духовна поука кон многубројниот верен народ, осврнувајќи се на големата борба на светите отци од Првиот вселенски собор за зачувување на вистинската вера на Црквата.
Тој нагласи дека седумнаесет векови по тој голем Собор, Црквата продолжува да ги ужива непроценливите духовни плодови од подвизите и жртвите на светите отци, бидејќи тие ја сочувале неизопачена вистината на Евангелието и им го предале на следните поколенија бесценетото богатство на православната вера.
Патријархот подвлече дека оваа вистина, која се родила преку жртви, молитви, солзи и исповедање на верата, не останала ограничена на места и времиња, туку патувала низ вековите и стигнала до краиштата на вселената, дури и до најоддалечените делови на благословената африканска земја.
Потоа, особено ја истакна непроценливата улога на великите отци на Александриската Црква, а пред сè на свети Атанасиј Велики, тој непоколеблив бранител на Православието, кој со непоколеблива вера и дух на саможртва ја бранел вистината на Црквата и оставил неизбришлив печат во историјата на Црквата на апостол Марко.
Исто така, се осврна и на патот на мисионерската дејност во Замбија, изразувајќи радост што денес, на места каде што некогаш не се слушало името Христово, сега одекнува молитвата, се воздигнува Чесниот Крст и се раѓаат нови живи заедници на верата. Тој нагласи дека Африка претставува голема прегратка на љубов и надеж за Александриската Патријаршија, плод на жртвите, трудовите и непрестајната пожртвуваност на мисионерите и локалните пастири.
Пред крајот на Божествената Литургија, Неговото Блаженство му го додели на претседателот на грчката заедница во Лусака, г. Георгиос Лиакопулос, Крстот на свети Сава Освештен, изразувајќи му желби за продолжување на значајното дело што се извршува во полза на хеленизмот и поддршката на мисионерското дело на Светата Митрополија на Замбија – се вели во известувањето.
Следуваше кратка средба на Неговото Блаженство со претседателот и членовите на православните заедници во Лусака и околните области, при што беа разгледани прашања поврзани со развојот на Православието во регионот, како и перспективите за зајакнување на заедничкиот и духовниот живот. Потоа беше организиран свечен пречек во Грчкиот центар во чест на Неговото Блаженство Патријархот г.г. Теодор II.
Настанот се одржа во топла и празнична атмосфера, давајќи им можност на членовите на заедницата да ја изразат својата почит, љубов и поддршка кон Александриската Патријаршија и нејзиното мисионерско дело на африканскиот континент.
