Германската редакција на Сојузот на православни журналисти објави анализа на растот на православието во Австрија. Во продолжение го пренесуваме преводот на оваа анализа.
Историски почетоци
Првите православни заедници на Православието во Австрија се појавиле уште во 17 век, во времето на монархијата, пред сè во главниот град Виена. Затоа, појавата на „гастарбајтерите“ од 1960-тите и 1970-тите години не е почеток на православниот живот во Австрија.
Различни јурисдикции
Во Австрија, седум различни јурисдикции формираат заедничка Епископска конференција, основана во 2010 година.
Во оваа Епископска конференција се застапени следниве јурисдикции:
* Митрополија на Австрија (Цариградска патријаршија)
* Антиохиска православна митрополија на Германија и Средна Европа
* Руска православна епархија на Виена и Австрија
* Српска православна епархија на Австрија
* Романска православна архиепископија на Германија, Австрија и Луксембург
* Бугарска православна епархија на Западна и Средна Европа
* Грузиска православна епархија на Германија и Австрија
Покрај јурисдикциите застапени во Епископската конференција, Руската задгранична Православна Црква има парохии во Салцбург, Линц и Клагенфурт, кои припаѓаат на Епархијата на Берлин и Германија, а Македонската православна црква има парохии во Виена и Линц, кои припаѓаат на Европската епархија.
Православни Украинци
По почетокот на војната во 2022 година, многу Украинци беа принудени да побараат заштита и помош во западните земји. Австрија не беше исклучок. Православните Украинци во голем број се приклучија кон различни православни парохии.
Со благослов на Митрополитот на Киев и на цела Украина, Онуфриј, Украинската Православна Црква започна да основа сопствени парохии во странство. Така, на пример, во главниот град Виена постои бројна православна заедница составена од бегалци од Украина.
Православна веронаука
Во Австрија, од учебната 1991/1992 година е можно во училиштата да се посетува православна веронаука, но на почетокот таа можност постоеше само во поголемите градови.
Поради постојано растечкиот број православни ученици во австриските училишта и потребата од подобра организација и координација на веронауката, во јуни 2005 година беше основана Православна школска канцеларија за Австрија како заедничка црковна установа. Таа стана надлежна внатрецрковна институција за сите организациски, правни, кадровски, дисциплински и административни прашања поврзани со православната веронаука.
Пораст на бројот на верници
Во последните години бројот на православни христијани постојано расте, така што денес Православната Црква претставува втората најголема христијанска конфесија во земјата (според државната статистика, во 2021 година околу 4,9 % од австриското население се изјаснило како православно, што изнесува приближно 436.700 луѓе).
Денес постојат две германскојазични парохии: една која припаѓа на Митрополијата на Австрија (на Цариградската Патријаршија) и една при руската православна катедрала на свети Никола во Виена. Употребата на државниот јазик во богослужбата е од голема корист за младите, бидејќи тие често повеќе не го владеат јазикот на своите предци и германскиот го разбираат подобро од нивниот изворен јазик. За растечкиот број преобратеници, богослужбите на германски јазик се корисни за полесно вклучување во духовниот свет на Православието.
Православието во општеството
Православната вера денес припаѓа му на австриското општество исто толку колку и другите христијански конфесии.
Црковните заедници се мошне активни на социјален план и, на пример, во Виена учествуваат во акцијата „Топла соба“, која во студениот период им помага на бездомниците преку атмосфера на солидарност, разговори и топол оброк. Други заедници поддржуваат хуманитарни проекти во своите земји на потекло.
Изградба на сопствени цркви
Во последните години повеќе парохии успеаја да изградат сопствени цркви, од кои некои веќе се завршени и осветени.
На 11 јуни 2022 година, во виенската населба Нордбанфиртел беше осветен олтарот на новата Романска црква посветена на Слегувањето на Светиот Дух, на свети Стефан Велики и на светиот епископ Мартин од Тур, со учество на повеќе епископи, меѓу кои митрополитот Арсениј Австриски од Цариградската Патријаршија, митрополитот Серафим (Јоанте) и неговиот викарен епископ Софјан од Кронштат.
На 21 декември 2025 година беше осветен олтарот на новата Романска црква посветена на светиот великомаченик Димитриј во Клагенфурт (Корушка) од митрополитот Серафим и викарниот епископ Софјан. На 17 јануари 2026 година беше осветен олтарот на новата Романска црква посветена на светите Јосиф Нови од Партос и Руперт од Салцбург во Санкт Рупрехт ан дер Рааб (Штаерска).
Почитување на австриските светители во Православието
Во последните години расте интересот во рамките на Православната Црква за локалните светители кои живееле и дејствувале на територијата на Австрија. Во календарите на Митрополијата на Австрија и на Романската православна архиепископија се вклучени некои од најзначајните светители.
Во Руската православна епархија на Виена и Австрија, по иницијатива на епископот Алексеј, беше формирана работна група која се занимава со овие светители и ги собира нивните житија, со цел да бидат доставени до Синодската комисија за светители во Москва, за воспоставување заеднички празник – собор на светителите на Австрија. Подготвените документи неодамна беа предадени на Синодската комисија. За празник на сите светители на Австрија беше предложен 26 октомври – австрискиот државен празник.
За овој празник – собор на австриските светители беа предложени следниве светители:
* св. маченик-епископ Максимилијан од Лорх † околу 284 (12 октомври)
* св. маченик Флоријан од Лорх и 40 соподвижници † 304 (4 мај)
* св. богоносен Северин од Норикум † 482 (8 јануари)
* св. рамноапостолен епископ Руперт од Салцбург † околу 718 (27 март и 24 септември)
* преподобни свештеномонаси Кунихалд и Гислар, ученици на св. Руперт (28 септември)
* преподобна Ерентруда, игуманија на Нонберг † 718 (30 јуни)
* св. епископ Виталис од Салцбург, ученик и наследник на св. Руперт † 730 (20 октомври)
* св. епископ Модест од Каринтија † околу 772 (3 декември)
* св. епископ Виргилиј од Салцбург † 784 (27 ноември и 24 септември)
* св. преподобномаченик Евсевиј од Ранквајл † 884 (31 јануари)
* преподобен пустиник Геролд од Големата Валзерска Долина † околу 978 (19 април)
* св. епископ Волфганг од Регенсбург † 994 (31 октомври)
* св. страстотерпец Коломан од Штокерау † 1012 (17 јули и 13 октомври)
* преподобна Хема од Гурк † 1045 (27 јуни)
Секако, постојат и многу други светители значајни за Австрија, како што се светите новомаченици од Куфштајн, меѓу кои св. Висарион Сарај и св. Опреа.
Заклучок
Ова се само дел од фактите за историјата и културата на Православието во денешна Австрија. Тие покажуваат дека бројот на православни верници постојано расте. Заедно со старите и новите миграциски бранови на православни христијани, како и со зголеменото преминување на Австријци во Православието, се создава перспектива дека влијанието на древната Православна Црква во овој регион ќе продолжи да расте и одржливо да се развива.