Обновување на објекти, функционални надградби и нови работни простории за работилници опфаќа планот од седум проекти што ќе бидат реализирани преку регионалните грчки власти во Атонската монашка држава. Одлуките ги потпиша регионалната гувернерка Атина Аидона, а вкупниот буџет изнесува 5,3 милиони евра.
Интервенциите се однесуваат на манастирите: Каракалу, Кутлумуш, Ксенофонт, Велика Лавра, Симонопетра и Свети Павле, како и на скитот Света Ана.
Во манастирот Каракалу ќе се извршат работи за одржување и обнова на соборниот храм (католиконот) и кулата. Во Кутлумуш е предвидена обнова и функционална надградба на дел од западната страна на манастирот.
Во манастирот Ксенофонт ќе биде уредено едно крило, додека во скитот Света Ана, кој е под јурисдикција на Велика Лавра, проектот се однесува на ќелијата „Успение на Пресвета Богородица“ поврзана со блаженоупокоениот старец Дамаскин.
Во рамките на истиот проект се предвидени и зајакнување на потпорните ѕидови, како и уредување на околниот простор.
Нова намена ќе добие и старата маслинарница на манастирот Симонопетра, која ќе биде претворено во изложбен простор. Во истиот проект е вклучена и изградба на меѓукат за работилници по иконопис и шиење.
Во манастирот Свети Павле, обновата на едно крило ќе овозможи создавање простории за грижа за постари лица.
Г-ѓа Аидона изјави дека европските средства се користат за обнова на изграденото наследство на светогорските манастири, истакнувајќи дека манастирите, скитовите и ќелиите претставуваат споменичко богатство на Атонската монашка држава.
Според Регионалната управа, целта на проектите е зградната инфраструктура да остане безбедна и функционална како за монашкиот живот, така и за посетителите на Света Гора.
Извор: https://orthodoxia.info/news/erga-53-ekat-eyro-se-mones-agioy-oroy/
