На 19 октомври 2024 година, претседателот на Одделот за надворешни црковни врски (ОНЦВ) на Московската Патријаршија, Митрополитот Волоколамски Антониј, отслужи Божествена Литургија во храмот „Успение на Пресвета Богородица“ при Амбасадата на Руската Федерација во Народна Република Кина, во Пекинг. Свеченоста е посветена на петнаесеттата годишнина од осветувањето на овој храм, кое се случи на 13 октомври 2009 година.
На архијерејот му сослужуваа: старешината на Успенскиот храм, јеромонахот Инокентиј (Колесников), старешината на парохијата на светите апостоли Петар и Павле во Хонг Конг, протојерејот Дионисиј Позднаев, старешината на парохиите во Шенжен и Гуангжоу, протојерејот Димитриј Лукјанов, старешината на Крстовоздвиженската парохија во Тајпеј, свештеникот Кирил Шкарбул, старешината на заедницата во Шангај, свештеникот Јован Шчолоков, службеникот на ОНЦВ јеромонахот Кирил (Перегудин), старешината на парохијата „Свети Архангел Михаил“ во Далиан, свештеникот Андреј Бухтеев, секретарот на претседателот на ОНЦВ свештеникот Николај Васин, ѓаконот Евгениј Кузнецов.
По богослужбата, Митрополитот Антониј, амбасадорот на Русија во НР Кина И.В. Моргулов и учесниците во свеченоста ја посетија обновената изложба во музејот при храмот, посветена на историјата на Руската духовна мисија во Кина.
Истиот ден се одржа свечен прием во име на амбасадорот на Русија во Кина. За време на настанот, митрополитот Антониј им се обрати на присутните со поздравно слово.
Првиот православен храм во Пекинг беше осветен во 1696 година во чест на Софија – Премудроста Божја. Црквата настрада од земјотрес во август 1730 година и по поправката две години подоцна беше преосветена во чест на Успението на Пресвета Богородица. Храмот беше уништен за време на востанието на Ихетуаните во 1900 година. Во 1902 година, Успенската црква на територијата на северното подворје на Руската духовна мисија во Кина беше изградена на ново место како привремен трпезариски храм, додека на местото на првиот храм се градеше соборот во чест на Сите свети маченици.
По затворањето на Руската духовна мисија во 1954 година, територијата на нејзиното северно подворје беше предадена на Амбасадата на СССР, а Успенскиот храм престана да се користи за својата намена – во него беше сместена гаражата на Амбасадата.
