На 23 октомври 2024 година, Светиот Синод на Украинската Православна Црква канонизираше двајца светители од 20 век: архимандрит Филарет (Кочубеј), игумен на манастирот Зверинеч во Киев, и блажениот Јован Скитник, јуродив заради Христа, за што известивме.
А на 6 април годинава, кога Украинската Православна Црква го празнува Соборот на отците од Зверинечкиот Скит во Киев, неговото Блаженство, Митрополитот Киевски и на цела Украина г. Онуфриј, ја предводеше службата на прославување на Свети Филарет од Зверинечкиот Скит. На службата сослужуваа седум архијереи, братството на манастирот и гости свештенослужители, известува Одделот за информации и образование на УПЦ.
Согласно на преданието, пред официјалното прославување, за свети Филарет беа прочитани последните заупокоени молитви. Одлуката на Синодот за канонизација ја прочита Митрополит Климент Нижински, раководител на Одделот за информации и образование. Потоа беше прочитано житието на светителот, а беа отпеани и неговите тропар, кондак и величание.
По читањето на Евангелието, митрополитот Онуфриј одржа беседа. За време на службата, тој ракоположи еден од ѓаконите на манастирот во свештенички чин.
По завршувањето на богослужбата, архијереите ги посетија пештерите каде што се подвизувале монасите и се поклонија пред светите мошти.
