82 мажи од 58 антиохиски парохии во 26 сојузни држави на САД и три канадски провинции се собраа во во Лигониер, Пенсилванија, САД, на првата конференција за свештеничкиот призив на Антиохиската архиепископија, насловена „Дали сакате да бидете свештеник?“.
Настанот се одржа од 20 до 23 август годинава, под раководство на Неговото Високопреосвештенство митрополит Сава. Од 54 учесници со себе ги донесоа своите сопруги или свршеници, еден учесник донел друг член на семејството, а шестмина донеле бебиња, со што вкупниот број присутни изнесувал 143 лица, соопшти Архиепископијата.
На сесиите се разговарало за духовниот живот на свештеникот и неговото семејство, практичните аспекти на подготовката за свештеничка служба, како и за предизвиците со кои се соочуваат парохиите, меѓу кои осаменоста, финансискиот стрес, парохиските конфликти, преселувањето и професионалното согорување.
Меѓу предавачите биле митрополитот Сава, епископот Јован, како и повеќе свештеници и нивните сопруги, кои зборувале врз основа на сопственото искуство во свештеничката служба.
Настанот опфатил предавања, панел-дискусии и разговори во помали групи, при што многу од учесниците останувале до доцна во ноќта во разговори со предавачите и по завршувањето на сесиите.
Викендот завршил со архијерејска Божествена литургија во неделата, на која началствувал митрополитот Сава, во сослужение со свештенството.
Учесниците го опишале настанот како пресвртна точка во нивното расудување за свештеничкиот повик. Еден од нив напишал дека искуството му помогнало да сфати дека треба да се врати кон основите на редовниот молитвен живот. Друг учесник, кој рекол дека отсекогаш чувствувал наклонетост кон свештенството, но не можел да ја објасни, изјавил дека настанот му помогнал да сфати дека таа желба е повик што го носи уште од детството.
Неколку учесници истакнале и колку е важно сопругите и свршениците да бидат вклучени во процесот на расудување за свештеничкиот повик. Еден од нив рекол дека настанот му дал појасна слика за свештенството „од двете страни“ – низ перспективата и на свештеникот и на неговата сопруга.
