„Службата на епископот е да биде во своето однесување, зборови и дела образ на Самиот Господ Исус Христос, Кој рече: ‘Јас сум добриот пастир: добриот пастир ја полага својата душа за овците’ (Јован 10, 11). Епископот треба да биде подготвен да ја положи својата душа за своето стадо, да биде негов добар и верен чувар. Затоа и Вие сте повикани да му служите на вашето стадо со несебична љубов и целосна посветеност… Вие сте повикани да го одржувате единството на верниците и да ги водите кон заедништво во љубов и вера. Св. апостол Павле нè советува: ‘Грижете се да го зачувате единството на Духот преку врските на мирот’ (Ефес. 4, 3). Епископот треба да го чува своето стадо од разногласие, ереси и поделби, стремејќи се кон единство во љубовта и вистината,“ со овие зборови се обрати Неговата Светост Бугарскиот патријарх Даниил кон новоракоположениот Знеполски епископ Мелетиј.
Епископската хиротонија на архимандрит Мелетиј се одржа на 15.09.2024 година, во Патријаршиската катедрала „Св. Александар Невски“. За да учествуваат во светата Литургија и хиротонијата, во катедралата се собраа Високопреосвештените митрополити: Ловчански Гаврил, Пловдивски Николај, Западно и Средноевропски Антониј, Неврокопски Серафим, Сливенски Арсениј и Епископите: Мелнишки Герасим, Адријанополски Евлогиј и Велички Сиониј.
Знеполскиот епископ Мелетиј (Спасов) е роден во Софија во 1985 година. Завршува средно образование со профил по германски јазик во 2005 година. Истата година е примен како студент на Богословскиот факултет при Софискиот универзитет, кој го завршува во 2009 година како дипломиран теолог со педагошки способности. Во академската 2007-2008 година специјализира теологија на Универзитетот во Јена, Германија. Во 2013 година успешно дипломира како магистер на катедрата за класична филологија при Софискиот универзитет.
Од 2012 година е примен како послушник во Дивотинскиот манастир „Св. Троица“, каде во 2014 година е замонашен од Браницкиот епископ Григориј, а во 2015 година е ракоположен за јероѓакон и јеромонах од епископот Григориј. Во периодот 2016-2017 година е испратен на теолошка специјализација во ОЦАД „Св. Кирил и Методиј“ во Москва. Од 2017 година е назначен за заменик-ректор за наставна дејност на Софиската духовна семинарија и предавач по Свето писмо на Новиот Завет. Од тогаш го раководи и хорот на Семинаријата. Од 2018 година е вонреден докторант по филозофија на Софискиот универзитет.
На 29 јуни 2022 година е воздигнат во чин архимандрит од Старозагорскиот митрополит Кипријан. На 10 септември 2024 година, на предлог на Пловдивскиот митрополит Николај, Светиот Синод одлучува да биде ракоположен во епископски чин со титула „Знеполски“.
Извор: https://bg-patriarshia.bg/news/hirotonia-na-znepolskia-episkop-meletiy
