Во вторник, на 25 февруари 2025 година, Романската Православна Црква одбележува 100 години од одлуката на Светиот Синод за воспоставување на Романската Патријаршија. Со оваа одлука, патријархот Мирон Кристеа, тогашен архиепископ на Букурешт и митрополит на Унгро-Влашка, стана првиот патријарх на Романија.
Романскиот парламент официјално ја призна синодската одлука со посебен закон, кој го прогласи кралот Фердинанд I, Обединителот, на 25 февруари 1925 година. Подоцна, на 30 јули 1925 година, Цариградската патријаршија формално го призна издигнувањето на Романската Православна Црква во ранг на патријаршија.
Митрополитот Мирон Кристеа беше востоличен како прв патријарх на Романија на 1 ноември 1925 година, во Патријаршиската катедрала во Букурешт.
Пред сегашниот Патријарх Даниел, Романската Православна Црква ја водеа петмина патријарси:
– Мирон Кристеа (1925-1939)
– Никодим Мунтеану (1939-1948)
– Јустинијан Марина (1948-1977)
– Јустин Моисеску (1977-1986)
– Теоктист Арапашу (1986-2007)
Стогодишнината на Романската Патријаршија беше одбележана во вторник со свечена Божествена Литургија и благодарствен молебен во Патријаршиската катедрала, на кои присуствуваа сите членови на Светиот Синод.
На крајот на богослужбата, официјално беше прогласена канонизацијата на исповедниците и мачениците од 20 век.
Романската Православна Црква е најголемата православна црква во рамките на Европската Унија. Во изминатите децении, таа се прилагоди на современите општествени реалности, задржувајќи силно присуство меѓу романската дијаспора и уживајќи репутација на динамична и урамнотежена Црква, која продолжува да ја проповеда апостолската вера во современиот свет – известува романскиот црковен медиум Базилика.ро.
Извор: https://basilica.ro/en/romanian-orthodox-church-marks-100-years-since-becoming-a-patriarchate/
