По повод 18-годишнината од неговото возведување на патријаршискиот престол, Патријархот Даниел на Романската Православна Црква ја истакна потребата од нагласување на духовните вредности за да можеме да живееме вечно во љубовта, мирот и радоста на Светата Троица.
„Треба да ги истакнуваме и духовните вредности кои ни помагаат не само да живееме овде, до гробот, туку да живееме во вечноста – во љубовта, мирот и радоста на Светата Троица. Затоа, кога зборуваме за Европа мислиме на Европа која е, пред сè, христијанска во својата вера“, објасни неговото Блаженство.
Патријархот нагласи дека Европа мора да ги зачува моралните вредности, а не само да се стреми кон материјален напредок.
„Европската култура има три големи компоненти: јудео-христијанското откровение на Светото Писмо и апостолската работа на најревносните меѓу апостолите; грчката филозофија — како мудрост акумулирана низ вековите; и римското право — како духовна сила за уредување на човечките заедници. Затоа не смееме да ја заборавиме најважната димензија на европската култура: христијанската вера. За нас, Европа е Европа на вредности, а не само на материјален напредок и, како што често се вели, на добар животен стандард“, додаде Патријархот Даниел.
Модел на граѓанство во Царството Небесно
Размислувајќи за сегашноста и иднината, во контекст на одлуката на Светиот Синод 2026 година да биде година за спомен на жените-светителки и свечена година на пастирска грижа за христијанското семејство, Патријархот Даниел ја посочи семејната заедница на свети Василиј Велики како пример.
„Затоа, следната година, кога ќе ја одбележиме Свечената година на христијанското семејство и Спомен-гoдината на светите жени — било мироносици, маченички, монахињи, сопруги или мајки — оваа година е посветена на важноста од зачувување на христијанската вера и нејзино пренесување преку семејството,“ рече тој.
„А иконата за следната година, која веќе ја добивте, е иконата на светителите од семејството на свети Василиј Велики, кое има осум членови впишани меѓу светителите. Тоа е граѓанството на Царството на Светата Троица,“ нагласи Патријархот.
Преку примерот на семејството на Свети Василиј, Патријархот Даниел повторно истакна дека „христијанските вредности најпрвин се примаат во семејството“, а потоа преку другите институции, меѓу кои и Црквата.
18 години за една катедрала
Говорејќи за изградбата на Националната катедрала, патријархот направи преглед на фазите низ кои проектот поминал во текот на изминатите 18 години.
„Три години беа потрошени за подготовка на проектите, а петнаесет години за самата изградба. Се разбира, некои катедрали со големината на нашата во Букурешт во средниот век се граделе и по 200 години,“ рече тој.
„Спомнав дека димензиите на нашата катедрала се речиси идентични со оние на катедралата Нотр Дам во Париз. И паралелно со оваа работа на катедралата, имавме и други обврски, бидејќи не може да се посветиш на нова градба занемарувајќи го она што си го наследил од претходниците,“ објасни Патријархот Даниел.
Во заклучок, патријархот повторно Му заблагодари на Бога и на сите кои ја поддржуваат работата на Црквата во општеството.
„Ова е Божјо дело, и затоа Му благодариме Нему, им благодариме на сите што ни помагаат — на свештениците и на лаиците, на централните и локалните власти — и, секако, имаме должност пред сè да ја нагласиме единството на верата и националното единство, чувствувајќи ја радоста на Божјата помош,“ заклучи неговото Блаженство.
Извор: https://basilica.ro/en/patriarch-daniel-europe-christian-values-18-years/
