Неговата Светост Српскиот Патријарх Порфириј, на 15 декември 2025 година во просториите на патријаршијата во Белград оствари разговор со Неговото Високопреосвештенство митрополитот на Алепо Ефрем од Антиохиската Патријаршија.
Во срдечен и братски разговор, гостинот го запозна патријархот со актуелната состојба на христијаните во Сирија, особено во градот Алепо, како и со бројните предизвици со кои тамошните православни верници се соочуваат поради повеќегодишните воени страдања, тешките економски услови и општата нестабилност.
Патријархот Порфириј истакна дека, врз основа на неодамнешното, идентично и горчливо историско искуство низ кое помина српскиот народ во Босна, како и на Косово и Метохија, целата Српска Православна Црква со длабока загриженост, молитвен трепет и сострадална братска љубов, но и со вера во победата на љубовта над омразата, го набљудува трпението на светите (Откр. 14, 12) во Сирија, истовремено восхитувајќи се на нивното истрајно и непоколебливо сведоштво за Евангелието, мирот и вистината во времиња на тешки искушенија.
Заклучувајќи ја денешната братска средба, соговорниците ја истакнаа важноста на мирот, дијалогот и меѓусебното разбирање, како и потребата христијаните, и покрај сите неволји, да истраат во верата, надежта и љубовта.
