Во Бристол, Велика Британија, од 15 до 17 мај 2026 година се одржа конгресот „NEPSIS UK 2026“, кој собра стотици православни млади од различни делови на Обединетото Кралство и други европски земји.
Специјален гостин на конгресот беше светогорскиот монах, отец Пимен Влад, игумен на келијата „Воведение на Пресвета Богородица“ во скитот Лаку на Света Гора, кој одржа духовни предавања посветени на автентичниот христијански живот во современото општество. Настанот се одржа со благослов на Архиепископот на Романската Православна Архиепископија на Велика Британија и Северна Ирска, Неговото Високопреосвештенство г. Атанасиј, кој во неделата началствуваше на Божествената Литургија во парохијата „Свети Константин и Елена“ во Бристол.
Во текот на првиот ден отец Пимен одржа духовен разговор со младите, споделувајќи дел од своето духовно искуство, што беше примено со големо внимание и емоции. Учесниците, исто така, ги посетија: катедралата во Велс, салата на Градскиот совет на Бристол и познатиот мост „Клифтон“.
Вториот ден започна со Божествена Литургија, на која стотици млади се причестија со Светите Христови Тајни. Потоа следуваше духовна конференција на која присуствуваа повеќе од 500 учесници, како и обемна сесија со прашања и одговори, при што отец Пимен одговараше на прашања поврзани со христијанскиот живот и современите предизвици. Денот заврши со Вечерна богослужба и драмска претстава посветена на традиционалните романски свадбени обичаи.
Посебен момент на конгресот беше и хуманитарниот маратон организиран од младите на „NEPSIS Bristol“, со цел поддршка на добротворните проекти на Архиепископијата, особено програмата „Едно дете, една светлина“, наменета за деца од социјално загрозени семејства.
На крајот од неделната Божествена Литургија, Архиепископот Атанасиј му го врачи на отец Пимен Крстот на Велика Британија за монаси, како признание за неговата духовна и мисионерска дејност.
Извор: https://roarch.org.uk/communion-and-the-joy-of-fellowship-on-the-first-day-of-the-nepsis-uk-congress/ преку: https://orthochristian.com/177685.html
