Апелацискиот суд во Хмелницки на 17 септември 2026 година ја остави непроменета пресудата против митрополитот Макаровски Антониј (Фиалко) од Украинската Православна Црква, потврдувајќи ја казната од две години затвор – известува украинскиот информативен портал „Левиот брег“.
Судскиот совет ја остави во сила како главната казна, која е заменета со две години условна казна, така и дополнителната мерка – забрана за вршење раководни функции во верски управи и епархии во период од две години. Притоа, одбраната го задржува правото да ја обжали пресудата по касационен пат во рок од три месеци.
Претходно, во мај 2026 година, Градско-окружниот суд во Хмелницки го прогласи 79-годишниот архијереј за виновен за „поттикнување верска омраза“ и „ограничување на правата на граѓаните врз верска основа“. Повод за покренување на кривичната постапка биле објавени видеоснимки од проповед од 2022 година, во која бил упатен повик да се заштити храмот од приврзаниците на префрлањето на црковната општина во ПЦУ (Православната Црква на Украина, чија автокефалија е доделена од Цариградската Патријаршија).
Во текот на судската постапка митрополитот Антониј не ја призна вината, објаснувајќи дека поради изминатото време не се сеќава на сите околности од таа богослужба, но нагласи дека секогаш ги повикувал луѓето на мир и согласност.
Од друга страна, сведокот на одбраната, помошник на настојателот на храмот, пред судот потврди дека зборовите на архијерејот биле насочени исклучиво кон заштита на Црквата од посегнувања на прекршители, а не против верниците на други вероисповеди.
Извор: https://lb.ua/society/2026/09/18/767058_hmelnitskiy_apelyatsiyniy_sud.html
