Кабинетот на министри на Украина забрани доделување цркви на верски организации на трајно користење. Со новата владина одлука од 22 август 2026 година се воведуваат правила според кои верската организација ќе има пристап до храмот само во определени часови за извршување богослужби.
Министерството за култура подготви предлог-измени со кои, според соопштението од Министерството за култура на Украина, на црковните заедници практично им се одзема можноста целосно да управуваат со црковниот имот. Наместо тоа, се воведува систем на временски ограничен пристап според однапред утврден распоред.
Државните институции ќе имаат целосна контрола врз црковните објекти, додека верниците ќе го задржат само правото да вршат богослужби во часовите што ќе бидат определени од надлежните власти.
Како образложение за одлуката, властите наведуваат дека „верските организации не секогаш имаат доволно средства за одржување на објектите на културното наследство, спроведување на неопходните реставраторски работи и заштита на објектите од оштетување, уништување или уривање“.
Истовремено, Министерството за култура употребува мошне широко формулирани одредби, поради што новите правила би можеле да опфатат речиси секој храм во земјата. Во документот се наведува дека правилата ќе се применуваат на објекти кои „бараат посебен режим на користење“ или кои „заеднички ги користат заедниците и културните институции“.
Официјално, Министерството за култура ги објасни промените со потребата од зачувување на објектите на културното наследство и со недостигот на средства кај верските организации. Но, украинските црковни медиуми сметаат дека новите правила во пракса најмногу ѝ одат во прилог на ПЦУ (Православната Црква на Украина, чија автокефалија е доделена од Цариградската Патријаршија), која нема доволно финансиски средства ниту доволен број верници за самостојно да ги одржува храмовите.
