Свештеникот на Украинската Православна Црква, протојереј Роман, беше претепан од екстремисти, поддржувачи на ПЦУ (Православната Црква на Украина, чија автокефалија е доделена од Цариградската Патријаршија) во близина на соборниот храм во градот Черонвци, во Украина, при неодамнешниот напад и обид за одземање на храмот, за што известивме.
Украинските црковни медиуми известуваат дека отец Роман моментално е во тешка состојба.
Екстремистите од ПЦУ го удирале со раце и нозе, го влечеле по земја полумртов, а потоа го фрлиле преку ограда висока три метри. Подоцна, тој бил хоспитализиран со амбулантно возило.
Се известува дека компјутерската томографија покажала дека отец Роман има скршени ребра и повредени бели дробови. Ставена му е цевка за дишење.
Исто така, свештеникот има скршен нос. Медицинскиот тим констатира и други бројни повреди – на срцето, градниот кош, карличните органи и ногата.
